இணையதளத்தில் கடன் வாங்கும்போது கவனிக்க வேண்டியது என்ன? - கோவை மாவட்ட எஸ்.பி பதில்

பொதுமக்கள் இணையதளத்தில் கடன் வாங்கும்போது எச்சரிக்கையாக இருக்க வேண்டும் என்று கோவை மாவட்ட காவல் கண்காணிப்பாளர் செல்வநாகரத்தினம் வலியுறுத்தியுள்ளார். கோவை மாவட்ட காவல் கண்காணிப்பாளர் செல்வநாகரத்தினம், சைபர் கிரைம் வழக்குகள் தொடர்பாகவும், இணையதளத்தில் கடன் வாங்குவது குறித்தும் செய்தியாளர்களை சந்தித்தார். அப்போது பேசிய அவர், “சைபர் கிரைம் பண மோசடி தொடர்பாக 2021-ம் ஆண்டு, 21 வழக்குகளும், 2022.ம் ஆண்டு துவங்கியது முதல் தற்போது வரை 13 வழக்குகள் பதிவு செய்யப்பட்டு, 6 பேர் கைது செய்யப்பட்டு சிறையில் அடைக்கப்பட்டுள்ளனர். இதுவரை புகாரின் பேரில் 18 லட்சத்து 57 ஆயிரத்து 787 ரூபாய் பணம் கைப்பற்றப்பட்டு, பாதிக்கப்பட்டவர்களிடம் திரும்ப கொடுக்கப்பட்டுள்ளது.பணமோசடி சம்பந்தப்பட்ட புகார்களில் 40 லட்சத்து 81 ஆயிரத்து 113 ரூபாய் பணம் முடக்கம் செய்யப்பட்டு, உரியவர்களிடம் ஒப்படைக்க நடவடிக்கை மேற்கொள்ளப்பட்டு வருகிறது. புகார்கள் துரிதமாக வரும்பொழுது குற்றவாளிகள் விரைவாக கைது செய்ய ஏதுவாக இருக்கும். பொதுமக்கள் பணத்தை இழந்த அந்த நொடியே1930 என்ற எண்ணுக்கு தொடர்பு கொண்டு, முதலில் தங்களின் தகவலை தெரிவித்து, மேற்கொண்டு பணம் போகாதபடி பத்திரப்படுத்தலாம். பின்னர் சைபர் கிரைம் காவல்நிலையத்தில் புகார் தெரிவிக்கலாம். நகை பறிப்பு குற்றவாளிகளை விரைந்து பிடிக்க மாவட்ட காவல்துறை சார்பில் பல்வேறு நடவடிக்கைகள் எடுக்கப்பட்டு உள்ளது. தொடர்ந்து முன்னாள் குற்றவாளிகளும் கண்காணிக்கப்பட்டு வருகின்றனர். இந்த சைபர் குற்றத்தில் படித்தவர்கள் அதிகளவில் ஈடுபடுகின்றனர். படிக்காத பொதுமக்கள் சமீப காலத்தில் விழிப்புணர்வு காரணமாக ஓடிபிகளை யாரிடமும் தெரிவிப்பதில்லை. ஆனால் படித்தவர்கள் அதிகளவில் ஏமாறுவதற்கு காரணம் இணையதள கடன். முகவரி இல்லாதவர்களிடம் கடனை வாங்கிக்கொண்டு சிக்கலில் சிக்கிக் கொள்கின்றனர். பொதுமக்கள் இணையதளத்தில் கடன் வாங்கும்போது எச்சரிக்கையாக வேண்டும். கடன் கொடுக்கும் இணையதள ஆப்புகள் தொடர்புகள், கேலரி உள்ளிட்ட தகவல்களை எடுத்துக்கொண்டு மிரட்டுகின்றனர். இவர்களிடம் எச்சரிக்கையாக இருக்க வேண்டும். இரண்டு வருடங்களில் சைபர் கிரைம் புகாரில் 25 வழக்குகள் பதிவு செய்துள்ளோம். சைபர் குற்றங்கள் புதுப்புது விதமாக உருவாகிக் கொண்டிருக்கிறது. சைபர் குற்றவாளிகள் பொதுமக்களுக்கும் காவல் துறைக்கும் இடையே உள்ள இடைவெளியை பயன்படுத்தி குற்றத்தை தொடர்கின்றனர். இணையதளத்தில் கடன் வாங்கும் பொழுது வாங்குவது சரியான இடமா? சரியான நபர்களிடமா? என்பதை பொதுமக்கள் முடிவு செய்ய வேண்டும். கோவை மாவட்ட சைபர் கிரைம் காவல்துறை சார்பில் பள்ளிகள் கல்லூரிகளில் தொடர்ந்து விழிப்புணர்வு ஏற்படுத்தி வருகிறோம். மேலும் போலீசார் வாகன சோதனை நடத்தும் இடங்களில் பிரச்சினைகள் வருவதை தவிர்க்க கோவை மாவட்ட காவல்துறை சார்பில் சாட் வெளியீடு செய்யப்பட்டுள்ளது. பொதுமக்களுக்கு தங்களின் மீது என்ன வழக்குகள் பதிவு செய்யப்படுகிறது என்பது இதுவரை தெரியாமல் இருந்தது. தற்போது அதை தெரிந்துகொள்ள வாகன சோதனை நடைபெறும் இடங்களில் வாகனத் தணிக்கை செய்யும் அதிகாரிகள் இந்த சாட்டை வைத்திருப்பர். இதில் வழக்கு அபராத தொகை போன்ற முழு விவரம் இருக்கும். எளிமையாக அபராதம் விதிக்கவும் வசதிகள் உள்ளது. மேலும் கோவை மாவட்டத்தில் குடிபோதை வழக்குகள் தொடர்ந்து மூன்று வழக்குகள் மேல் பதிவு செய்யப்பட்டால் ஐபிசி வழக்குகள் பதிவு செய்யப்படும்” இவ்வாறு தெரிவித்துள்ளார்.
http://dlvr.it/SLtg3t

Read More

பப்பாளி முதல் தர்ப்பூசணி வரை.. சாப்பிடக்கூடிய சத்து நிறைந்த 5 விதைகள்?

குழந்தைகள் பழங்கள், காய்கறிகள் சாப்பிடும்போது தவறுதலாக விதையை விழுங்கிவிட்டால் வயிற்றுக்குள் செடி முளைக்கும் என்று விளையாட்டாக கூறி பயமுறுத்துவர். நம்மில் பலருக்கும் வயிற்றுக்குள்ளிருந்து மரம் முளைத்துவரும் என்று பயந்த அனுபவமிருக்கும். சிறியவர்கள் முதல் பெரியவர்கள் வரை பழங்கள் சாப்பிடும்போது விதைகளை எடுத்துவிட்டு சாப்பிடுவதில் கவனமாக இருப்போம். ஆனால் நாம் சாப்பிட முடியாதவை என கருதும் சில விதைகள் ஆரோக்கியமானவை என்று நம்மில் பலருக்கும் தெரியாது. நிராகரிக்கக்கூடாத சில விதைகள் பூசணி விதைகள் பூசணி விதைகள் ஆரோக்கியமான ஒரு தீனி என்றே சொல்லலாம். இந்த விதைகளை சிறிது உப்பு சேர்த்து வறுத்து சாப்பிட சுவையாக இருக்கும். இதில் உடலின் நோயெதிர்ப்பு சக்தியை அதிகரிக்கும் ஆரோக்கியமான கொழுப்புகள், வைட்டமின்கள் நிறைந்துள்ளன. தர்பூசணி விதைகள் நீர் சொட்ட சொட்ட இனிப்பான தர்பூசணியை சுவைக்கும்போது தெரியாமல் ஒரு விதையை சாப்பிட்டுவிட்டால் பழத்தின் சுவையையே இழந்ததுபோன்ற உணர்வு நம்மில் பலபேருக்கும் வந்திருக்கும். ஆனால் அந்த விதையில் புரதச்சத்து நிறைந்திருப்பது நமக்கு தெரிந்திருக்க வாய்ப்பில்லை. மேலும், அதில் ஒமேகா 3 கொழுப்பு அமிலம், மக்னீசியம் மற்றும் பிற சத்துகளும் நிறைந்திருக்கின்றன. புளியங்கொட்டை இந்தியாவில் பெரும்பாலான உணவுகளில் புளி பயன்படுத்தப்படுகிறது. இதிலுள்ள புளிப்புச்சுவை மற்றும் ஊட்டச்சத்துகள் பற்றி நமக்கு தெரியும். ஆனால் புளியங்கொட்டையும் சாப்பிடக்கூடியதுதான் என்று நமக்கு தெரியாது. புளியங்கொட்டைகள் இதய ஆரோக்யம் மற்றும் பற்கள் ஆரோக்யத்தை மேம்படுத்தும். மேலும் தொற்றுநோய்களைத் தடுக்க உதவும். பப்பாளி விதைகள் நாம் தூக்கியெறியும் விதைகளில் ஒன்றான பப்பாளி விதையின் ஏகப்பட்ட நன்மைகள் நிறைந்திருக்கின்றன. நாள்பட்ட நோய்களுக்கும் ஆக்ஸிஜனேற்ற அழுத்த பிரச்னைக்கும் சிறந்த மருந்து. ஃபிளாவனாய்டுகள் மற்றும் பாலிபினால்கள் நிறைந்த பப்பாளி விதைகள் அதிக ஊட்டச்சத்து நிறைந்தவை. சணல்(Hemp) விதைகள் சணல் விதைகள் என்றாலே அதன் ஆரோக்யம் மீதான சந்தேகம்தான் மனதில் எழும். ஆனால், உண்மையில் சணல் விதைகளில் நிறைய சத்துகள் உள்ளன. இயற்கையாக கிடைக்கக்கூடிய புரதச்சத்துகள் நிறைந்த விதைகளில் ஒன்று இது. மேலும் இதயம் மற்றும் சருமம் சார்ந்த நோய்களிலிருந்து பாதுகாக்கிறது.
http://dlvr.it/SLsYc0

Read More

``ஆட்டம் இன்னும் முடியவில்லை, எங்கள் ஆதரவில்லாமல்..!" - பாஜக-வைச் சாடிய மம்தா

நடந்து முடிந்த ஐந்து மாநில சட்டமன்றத் தேர்தலில், பஞ்சாப்பை தவிர மற்ற 4 மாநிலங்களில் பா.ஜ.க ஆட்சியைக் கைப்பற்றியது. பஞ்சாப்பில் மட்டும் ஆம் ஆத்மி முதல்முறையாக 92 இடங்களைக் கைப்பற்றி ஆட்சியமைத்தது. இந்த 5 மாநிலத் தேர்தலில் மேற்கு வங்க முதல்வர் மம்தா பானர்ஜி, உத்தரப்பிரதேசத்தில் பா.ஜ.க-வுக்கு எதிராக, அகிலேஷ் யாதவின் சமாஜ்வாடி கட்சியை வெளிப்படையாக ஆதரித்துவந்தார். ஆனால் தேர்தல் முடிவில், 255 இடங்களைக் கைப்பற்றிய பா.ஜ.க மீண்டும் உத்தரப்பிரதேசத்தில் ஆட்சியைக் கைப்பற்றியது. அகிலேஷின் சமாஜ்வாடி 111 இடங்களை மட்டுமே கைப்பற்றியது. இந்த நிலையில், மேற்கு வங்க முதல்வர் மம்தா பானர்ஜி நேற்று சட்டமன்றத்தில் பா.ஜ.க-வை விமர்சித்துப் பேசினார்.யோகி ஆதித்யநாத் அப்போது பேசிய மம்தா, ``ஆட்டம் இன்னும் முடியவில்லை. சமீபத்தில் நடந்த சட்டமன்றத் தேர்தலில் 4 மாநிலங்களில் பா.ஜ.க வெற்றி பெற்றிருந்தாலும், நாடு முழுவதும் உள்ள மொத்த சட்டமன்ற உறுப்பினர்களின் எண்ணிக்கையில் பாதி கூட இல்லாததால், வரவிருக்கும் ஜனாதிபதி தேர்தலில் வெற்றி பெறுவதென்பது பா.ஜ.க-வுக்கு எளிதானது அல்ல. எங்கள் ஆதரவு இல்லாமல் நீங்கள் (பா.ஜ.க) கடக்க மாட்டீர்கள். உத்தரப்பிரதேசத்தில் சமஜ்வாடி தோற்றிருந்தாலும் கூட, கடந்த முறையை விடவும் அதிகமான சட்டமன்ற உறுப்பினர்களை இந்த முறை சமாஜ்வாடி வைத்துள்ளது. அதை நீங்கள் மறந்துவிடக் கூடாது" எனப் பேசினார்.மம்தா பானர்ஜி மேலும் பெகாஸஸ் பற்றி பேசிய மம்தா, ``என்னுடைய தொலைபேசியும் ஒட்டு கேட்கப்படுகிறது. எதையாவது பேசினால் தெரிந்துவிடும். மூன்று வருடங்களுக்கு முன்பு எனக்கும் பெகாசஸ் வாங்க ஆஃபர் வந்தது. ஆனால் நான் அதை வாங்கவில்லை. அந்தரங்கத்தில் தலையிடுவதில் எனக்கு நம்பிக்கை இல்லை. ஆனால் பல பா.ஜ.க ஆளும் மாநிலங்கள் பெகாசஸ் நிறுவனத்தை விலைக்கு வாங்கியுள்ளன" என்று கூறினார்."காங்கிரஸ் விரும்பினால் 2024 -ல் இணைந்து தேர்தலை சந்திக்கலாம்!" - மம்தா பானர்ஜி
http://dlvr.it/SLs0FN

Read More

மேக்கேதாட்டூ விவகாரம்: கர்நாடகாவைக் கட்டுப்படுத்த தமிழக அரசு செய்யவேண்டியவை என்ன?

சட்டமன்ற நிதிநிலை அறிக்கையில் காவிரியின் குறுக்கே மேக்கேதாட்டூவில் அணைகட்ட 2022-23 நிதியாண்டில் ரூ.1,000 கோடியை ஒதுக்கி, தமிழ்நாட்டில் அரசினர், அரசியல் கட்சியினர், உழவர் சங்கங்கள் மற்றும் நடுநிலையான அறிவாளிகளிடையே மிகப் பெரிய தாக்குதலைத் தொடுத்துள்ளது கர்நாடகா. கடந்த பத்தாண்டுகளாகவே கர்நாடக அரசு, காவிரியில் தமிழகம் - புதுச்சேரி கீழ்மடை மாநிலங்களுக்குரிய அளவு நீரைக் காலத்தே வழங்காமல் கர்நாடகாவின் பாசனப் பரப்பைக் கூட்டிட, சதித் திட்டங்களின் மூலமாகச் சட்டத்திற்குப் புறம்பாகப் பயன்படுத்திவருகிறது. கடந்த 16-02-2018 அன்று உச்ச நீதிமன்ற மேல் முறையீட்டு வழக்கில் வழங்கப்பட்ட தீர்ப்பின்மூலம், தமிழ்நாட்டின் பங்கில் 14.75 டிம்சி நீர் (பெங்களூரு குடிநீர் வழங்கல் என்ற பெயரில்) கர்நாடாகாவுக்கு வழங்கப்பட்டது. இது காவிரி நதிநீர் நடுவர் மன்றத்தின் தீர்ப்பிற்கு மேல் கூடுதலாக வழங்கப்பட்ட ஓரவஞ்சனைத் தீர்ப்பு. கல்லணை 1960 -70 ஆண்டுகளில் ஆண்டுக்கு 350 டிஎம்சி வரப் பெற்ற தமிழ்நாட்டின் பங்கு, காவிரி நதி நீர் நடுவர் மன்ற இடைக்கால தீர்ப்பில் 205 டிஎம்சி (1990) யாகக் குறைந்து - இறுதித் தீர்ப்பில் (2007) 192 டிஎம்சியாகக் குறைந்தது. இதற்கு மேலும் அடிமேல் அடியாக இந்த அளவு - உச்சநீதிமன்ற மேல் முறையீட்டில் (16-02-2018) மேலும் 14.75 டிஎம்சி குறைந்து 177.25 டிஎம்சியாக ஆனது. இதையும் முறையாக கர்நாடகா மாதா மாதம் வழங்குவதில்லை. பெரும் வெள்ளக் காலங்களில் மட்டும் தமிழகத்தை வடிநிலமாகப் பயன்படுத்தி மிகு வெள்ளநீரை - நாம் பயன்படுத்த முடியா வண்ணம் விடுவிக்கிறது. நமக்கு வரப்பெற்ற மிகு வெள்ள நீரைப் பயன்படுத்தும் காவிரி - குண்டாறு இணைப்புக் கால்வாய், மேட்டூர்- சரபங்கா நீரேற்றும் திட்டங்களுக்குக் கூட முட்டுக்கட்டைபோட்டு வருகிறது. இது குறித்து ஒன்றிய அரசோ காவிரி மேலாண்மை ஆணையமோ கண்டுகொள்வதில்லை. இதன் பின்பும் பெங்களூரு போன்ற நகரங்களுக்கு குடிநீர் என்ற போர்வையில் மேக்கேதாட்டூ என்னுமிடத்தில் 67.16 டிஎம்சி கொள்ளளவு கொண்ட நீர்த்தேக்கம் அமைக்க ரூ.9,000 கோடியில் விரிவான திட்ட அறிக்கையினைக் கர்நாடகா தயாரித்து ஒன்றிய அரசு, மைய நீர்வள ஆணையம் மற்றும் காவிரி மேலாண்மை ஆணையம் இவற்றின் ஒப்புதலைப் பெறத் தீவிரமாக முயன்றுவருகிறது. இதைக் காவிரி மேலாண்மை ஆணைய கூட்டங்களில் விவாதித்திட, இந்த ஆணையத்தை வற்புறுத்துகிறது. தமிழ்நாடு அரசு ஒவ்வொரு முறையும் இப்பொருளை விவாதித்திட கடும் எதிர்ப்பு தெரிவிக்கிறது. இந்த நிலையில்தான் கர்நாடகா முதல்வர் பசவராஜ் பொம்மை கங்கணம் கட்டிக் கொண்டு மேக்கேதாட்டூ அணை எங்களின் உரிமை என்று சொல்லி அணையைக் கட்டியே தீருவோம் என்று சூளுரைத்து ஒன்றிய அரசுக்குத் தொடர்ந்து அழுத்தம் தருகிறார். அண்மையில் (05-03-2022) பெங்களூரு வந்த ஒன்றிய அரசின் நீர்வளத்துறை அமைச்சர் கஜேந்திர சிங் செகவாட், இருமாநிலங்களிடமும் பேச்சு வார்த்தை நடத்தி ஒப்புதல் பெற்று மேக்கேதாட்டூ அணை கட்ட ஏற்பாடு செய்யப்படும் என்று தெரிவித்திருக்கிறார். காவிரி இவற்றிற்கு எதிர்வினையாக - தமிழக அரசின் நீர்வளத்துறை அமைச்சர் துரைமுருகன் கடும் எதிர்ப்பைத் தெரிவித்ததுடன் கர்நாடகாவின் மேக்கேதாட்டூ அணையானது காவிரி நடுவர் மன்ற இறுதித் தீர்ப்புக்கும் (05-02-2007) உச்சநீதிமன்ற உத்தரவுக்கும் (16-02-2018) எதிரானது. எனவே ஒன்றிய அரசின் நீர்வளத்துறையும் காவிரி மேலாண்மை ஆணையமும் - இதற்கு ஒப்புதல் கொடுக்கக்கூடாது. ஒன்றிய அரசு இதில் ஒருதலைப் பட்சமாகச் செயற்படக் கூடாது என்றும் காவிரி நதி நீரில் தமிழகத்திற்குள்ள உரிமையை நிலை நாட்ட அனைத்து சட்ட நடவடிக்கைகளையும் எடுப்போம் என உறுதிபடத் தெரிவித்துள்ளார். இதற்கிடையில் நாளிதழ் ஒன்றில், காவிரி மேலாண்மை ஆணையம் சார்பில், தம் கூட்டத்தில் இதுகுறித்து விவாதிக்க அதிகாரம் உரிமை உண்டா என்பது குறித்து சட்ட வல்லுநர்களிடம் கருத்துரை கேட்க முடிவெடுத்துள்ளதாக அதன் தலைவர் ஹல்தர் தெரிவித்துள்ளார். 18-03-2022 அன்று தொடங்கவிருக்கும் தமிழக சட்டமன்றக் கூட்டத்தில் கர்நாடகாவைக் கண்டித்துத் தீர்மானம் நிறைவேற்றப்படும் என்று எதிர்பார்க்கிறோம். கிருஷ்ணராஜசாகர் அணை̀அந்த 5 அணைகளில் ஏமாந்ததைப் போல மேக்கேதாட்டூவிலும் தமிழகம் ஏமாறக்கூடாது!' - எச்சரிக்கும் பொறியாளர் வீரேந்திர பாட்டில், தேவ கவுடா, எடியூரப்பா, குமாரசாமி, சித்தராமையா, பசவராஜ் பொம்மை என கர்நாடகாவில் எந்தக் கட்சி முதல்வராக இருந்தாலும் கடந்த 40 ஆண்டுகளுக்கு மேலாகக் காவிரியில் தமிழகத்திற்குரிய உரிமையளவினை வழங்காமல், மறைமுக மாற்றுத் திட்டங்களின் மூலம் அவர்தம் பாசனப் பரப்பைக் கூட்டிக்கொண்டே வந்துள்ளனர். ஒரு மாநில அரசும் அதன் முதலமைச்சர்களும் இந்திய அரசியல் அமைப்புச் சட்டத்தை ஒரு சிறிதும் மதிக்காமல் கீழ்மடை மாநிலமான தமிழ்நாட்டிற்குத் தொடர்ந்து தொல்லைகள் தந்து வருகின்றனர். தற்போது மேக்கேதாட்டூவில் பெரும் நீர்த்தேக்கத்தைக் கட்டத் தீவிரமாக முனைந்துள்ளனர். ஆனால் பொய்யான செய்திகளைப் புனைந்துரைக்கின்றனர். 1974-க்குப் பின்னே எந்தக் காலத்திலும் எந்தச் சமயத்திலும் தமிழகத்திற்குரிய காவிரி நீரை நடுவர்மன்ற இடைக்காலத் தீர்ப்பில் (25, ஜூன் 1991) அளிக்கப்பட்ட 205 டிஎம்சி தண்ணீரையோ, காவிரி நடுவர் மன்ற இறுதித் தீர்ப்பில் (05-02-2007) வழங்கப்பட்ட 192 டிஎம்சி தண்ணீரையோ எந்தக் காலத்திலும் வழங்கியது கிடையாது. ஒப்பந்த விதிகள், உச்சநீதிமன்ற அறிவுறுத்தல்கள், காவிரி நடுவர் மன்றத் தீர்ப்புகள் மற்றும் உச்சநீதிமன்ற வழிகாட்டி நெறிகள் அனைத்துமே கர்நாடக அரசுக்கு ஒரு பொருட்டல்ல. அவை மீறப்படுவதற்கே என்ற மனப்பான்மை போக்கு கர்நாடக அரசிடமும் அதன் அரசியல்வாதிகளிடமும் ஏன் கர்நாடக விவசாயிகளிடமும் ஊறியுள்ளது என்பது பலமுறை உறுதிப்படுத்தப்பட்டுள்ளது. காவிரி நதி கர்நாடக மாநிலத்தில் ஓடுவதால் அவர்களின் பயன்பாட்டிற்குப் போக மீதியுள்ள வெள்ள உபரி தண்ணீர்தான் இதுவரை வடிகாலாக (நிறுத்தி வைத்துக்கொள்ள கட்டமைப்பு வசதிகள் இல்லாமையால்) தமிழகத்திற்கு விடப்பட்டுள்ளது. எங்கள் அணைகள் முழுக் கொள்ளளவை எட்டினால்தான் உபரி நீர் தமிழ்நாட்டுக்கு, அவை நிரம்பாவிட்டால் ஒரு சொட்டுத் தண்ணீர்கூட தமிழ்நாட்டுக்குத் தரமாட்டோம் என்பதுதான் அவர்களின் வாடிக்கையான கொள்கை முழக்கம்.அணைசுற்றுச்சூழல் பாதிக்குமென தெரிந்தும் அணை கட்ட துடிப்பது ஏன்? - மேக்கேதாட்டூ விவகாரம் இந்த கடந்த கால நிகழ்வுகளின் அடிப்படையில்தான் இந்திய அரசும் தமிழக அரசும் எதுவும் செய்து விட முடியாது, செய்ய மாட்டார்கள் என்ற தடாலடி அரசியல் அடிப்படையில் எவ்வளவு முறையற்றதாகவும் ஒப்பந்தத்தை மீறியதாக இருந்தாலும் 67 டிஎம்சி கொள்ளளவில் மேக்கேதாட்டூவில் அணை கட்டிட கர்நாடக அரசு தொடர் முயற்சியில் இறங்கியுள்ளது. இச்சதித்திட்டத்தைப் புரிந்து கொண்டு இப்போதாவது தமிழக அரசு ஒரு சிறிதும் காலம் தாழ்த்தாது விரைந்து தடுப்பு நடவடிக்கைகளில் இறங்கிட வேண்டும் என்பது தமிழக மக்களின் நியாயமான எதிர்பார்ப்பு கோரிக்கை. நம்முடைய அரசியல் அமைப்புச் சட்டப்படி காவிரி நடுவர் மன்றம் ஓர் அரசியல் அமைப்பு சட்ட நிறுவனம். அதைப்போலவே இந்திய உச்ச நீதிமன்றமும் ஓர் அரசியல் அமைப்பு நிறுவனம். ஒவ்வொரு மாநில அரசும் சட்டமன்றமும் அரசியல் அமைப்பின்படி நிறுவப்பட்டவை. எனவே எந்த மாநில அரசும் அரசியல் அமைப்புச் சட்டப்படி நியமிக்கப்பட்ட நிறுவனங்களின் அறிவுத்தல்கள்படியே நடந்திட செயல்களை ஆற்றிட வேண்டும். இவற்றிற்கு மாறாக நடக்க கர்நாடக மாநிலத்திற்கு எந்த உரிமையும் இல்லை, தனிப்பட்ட அதிகாரமும் கிடையாது. ஆனால் கர்நாடகா அரசு 1970 முதல் இன்று வரை மேற்குறிப்பிட்ட அரசியல் சட்ட அமைப்புகளின் தீர்ப்புக்கெதிராகவே தொடர்ந்து நடந்துவருகிறது. காவிரி நதிநீர்ப் பங்கீட்டில் இவ்விதி மீறலை, முறைகேடான கர்நாடகா அரசின் அப்பட்டமான சட்டத்திற்கெதிரான நடவடிக்கைகளை, குறிப்பாக 1973-1980 ஆண்டுகளில் காவிரி உடன்படிக்கைக்கு எதிராக தமிழ்நாடு உள்ளிட்ட ஒன்றிய அரசு, நடுவணரசின் மைய நீர்வள ஆணையம், மையத் திட்டக்குழு முதலியவற்றின் ஒப்புதலன்றி கட்டிய கபினி, ஹாரங்கி, ஹேமாவதி, யாகாச்சி, சுவர்ணவதி - முதலிய ஐந்து அணைகள் - இந்திய அரசியல் அமைப்புச் சட்டத்திற்கெதிரானவை எனக் குற்ற குறிப்பாணை அனுப்பிக் கர்நாடகாவைக் குற்றவாளிக் கூண்டில் ஏற்றவேண்டும்.அணைமேக்கேதாட்டூ அணைக்கு விரைவில் அனுமதி? மத்திய அமைச்சரின் சூசக பதிலால் கொதிக்கும் தமிழக விவசாயிகள்! மேலும் தற்போதைய மேக்கேதாட்டூ அணை கட்டலைத் தடுத்திட உச்சநீதிமன்றத்தில் போட்டுள்ள வழக்கை விரைவுபடுத்த வேண்டும். மிகச் சிறந்த வல்லுநர் வழக்கறிஞர்களை நியமித்து வாதாடவேண்டும். ஒன்றிய அரசின் நீர்வளத்துறை அமைச்சர், நடுவணரசு நீர்வள ஆணையம் மற்றும் காவிரி நிதிநீர் மேலாண்மை ஆணையம் மீதும் தனித்தனியாக நீதிமன்ற அவமதிப்பு வழக்குகள் தொடர்ந்து வலியுறுத்தி வாதாடவேண்டும். இந்திய ஒன்றிய அரசின் தலைமையமைச்சர் மற்றும் குடியரசுத் தலைவருக்கு கவன ஈர்ப்பு விண்ணப்பங்கள் அனுப்பி இந்திய அரசியல் சட்டம் எண் 365-ன்படி கர்நாடாக அரசுக்குத் தாக்கீது அனுப்பச் செய்ய வேண்டும். இது தொடர்பாக ஒன்றிய அரசுக்கும் குடியரசு தலைவருக்கும் அறிவுறுத்தல் வழங்கிடச் சிறப்புமனு வழக்கு ஒன்றினை உச்ச நீதிமன்றத்திலும் தமிழ்நாடு அரசு உடன் தொடுத்திட வேண்டும். இவை தவிர கர்நாடகா மாநிலத்தைக் கட்டுப்படுத்தும் வகையில் பொருளாதாரத் தடைகளையும் தமிழ்நாடு அரசு கருதலாம். இச்சிக்கல் தமிழ்நாட்டின் - காவிரிப் பாசனப் பகுதிகளின் - தமிழக உழவர்களின் உயிர்ப்பிரச்னை என்ற உணர்வு - தமிழக நீர்வளத்துறை மேல் அலுவலர்கள், தலைமைப் பொறியாளர்கள் மற்றும் காவிரி தொழில்நுட்பக் குழுவின் பொறியாளர்கள், தமிழ்நாட்டு வழக்கறிஞர்கள் அனைவருக்கும் இருக்க வேண்டும்.முனைவர் அ.வீரப்பன் இரு மாநிலங்களுக்கிடையே பேச்சுவார்த்தை என்பது காலங்கடத்தும் கர்நாடகாவின் சதித்திட்டங்களுக்கு துணைபோகும் செயல். 35 ஆண்டுக்கால காவிரிப் பேச்சுக்கள் நமக்குக் கற்றுக் கொடுத்த படிப்பினை. எனவே எந்தக் காலத்திலும் பேச்சு வார்த்தைக்குத் தமிழ்நாடு அரசு ஒத்துக் கொள்ளக் கூடாது. இதில் ஒன்றிய அரசினை ஒரு சிறிதும் நம்பி விடக் கூடாது. காவிரி நதிநீர் இன்றேல் தமிழ்நாடு பாலைவனமாகிவிடும் என்று தமிழக முதல்வர் அவர்களும் இச்சிக்கலுக்குத் தலையாய முன்னுரிமை கொடுத்துத் தமிழக மக்களின் உரிமைகளைக் காத்திட ஆவன செய்யவேண்டும் என்று வேண்டுகிறோம். -மூத்த பொறியாளர் முனைவர் அ.வீரப்பன்
http://dlvr.it/SLrXXq

Read More

திருமணத்துக்கு மறுத்த காதலியின் தந்தை... பார்ட்டிக்கு அழைத்து கழுத்தை அறுத்து கொன்ற காதலன்

மும்பை உல்லாஸ் பகுதியை சேர்ந்தவர் பப்பு குமார் ஷா(26). பீகாரை சேர்ந்த ஷா கடந்த ஐந்து ஆண்டுகளாக மும்பையில் தங்கி இருந்து வேலை செய்து வருகிறார். ஷா அதே பகுதியை சேர்ந்த பெண் ஒருவரை காதலித்து வந்தார். காதலியை திருமணம் செய்து கொள்ள காதலியின் தந்தையான கமல்ஜித் என்பவரிடம் சென்று நேரடியாக பெண் கேட்டார் ஷா. ஆனால் கமல்ஜித் தனது மகளை திருமணம் செய்து கொடுக்க முடியாது என்று தெரிவித்துவிட்டார். இதனை ஏற்றுக்கொண்ட ஷா, பெண் கேட்டதற்காக மன்னிப்பு கேட்டுக்கொண்டார். கொலை இச்சம்பவம் நடந்த அடுத்த சில தினங்களில் ஷா சிறப்பு பார்ட்டி ஒன்றுக்கு ஏற்பாடு செய்தார். அந்த பார்ட்டியில் கலந்து கொள்ள வேண்டும் என்று தனது காதலியின் தந்தைக்கு அழைப்பு விடுத்தார். காதலியின் தந்தை கமல்ஜித்தும் பார்ட்டியில் கலந்து கொண்டார். பார்ட்டியில் அனைவரும் நல்ல குடிபோதையில் இருந்த போது கமல்ஜித்தை ஷா ஒதுக்குப்புறமான இடத்திற்கு அழைத்து சென்று, ``எனக்கு உனது மகளை திருமணம் செய்து கொடுக்கமாட்டாயா” என்று கேட்டு கமல்ஜித்தின் கழுத்தை அறுத்து கொலை செய்தார். பின்னர் ஷா தனது காதலிக்கு போன் செய்து, ``உனது தந்தை இனி வீட்டிற்கு வரவே மாட்டார். அவரை கொலை செய்துவிட்டேன்” என்று தெரிவித்தார். இது குறித்து உடனே அப்பெண் போலீஸாருக்கு தகவல் கொடுத்தார். போலீஸார் விரைந்து வந்து ஷாவை கைது செய்து கமல்ஜித் உடலை மீட்டு பிரேத பரிசோதனைக்கு அனுப்பிவைத்தனர். கைது செய்யப்பட்ட ஷாவிடம் போலீஸார் தீவிர விசாரணை நடத்தி வருகின்றனர்.
http://dlvr.it/SLrCYJ

Read More

ஏவுகணை பாய்ந்ததற்கு பதிலடி கொடுக்க தயாரான பாகிஸ்தான் - நடந்தது என்ன? கசியும் தகவல்கள்

இந்திய ஏவுகணை தவறுதலாக பாகிஸ்தானுக்கு பாய்ந்ததற்கு எதிர்வினையாக உடனடி பதிலடி கொடுக்க பாகிஸ்தான் தயாரானதாக தகவல் வெளியாகியுள்ளது. ஹரியாணா மாநிலம் அம்பாலாவில் உள்ள ராணுவத் தளத்தில் இருந்து கடந்த 9-ம் தேதி பாய்ந்த ஏவுகணை, பாகிஸ்தானின் பஞ்சாப் மாகாணத்தில் விழுந்தது. எனினும், இந்த சம்பவத்தில் யாருக்கும் பாதிப்பு ஏற்படவில்லை. ஆசிய பிராந்தியத்தில் பெரும் பரபரப்பை ஏற்படுத்திய இந்த நிகழ்வுக்கு இந்தியா வருத்தம் தெரிவித்ததுடன், தொழில்நுட்பக் கோளாறால் இந்த விபத்து ஏற்பட்டதாகவும் விளக்கம் அளித்தது. இந்த விளக்கத்தை முழுமையாக ஏற்க மறுத்த பாகிஸ்தான், இஸ்லாமாபாத்தில் உள்ள இந்தியத் தூதரக அதிகாரியை நேரில் அழைத்து கண்டனம் தெரிவித்தது. அதுமட்டுமின்றி, இந்த விவகாரம் குறித்து இரு நாடுகளும் இணைந்து கூட்டு விசாரணை நடத்த வேண்டும் எனவும் வலியறுத்தி வருகிறது. இதனிடையே, இந்தச் சம்பவம் தொடர்பாக நாடாளுமன்றத்தில் மத்திய பாதுகாப்புத் துறை ராஜ்நாத் சிங்கும் நேற்று விளக்கம் அளித்தார். இந்நிலையில், அமெரிக்காவைச் சேர்ந்த ப்ளூம்பெர்க் என்ற ஊடக நிறுவனம் இந்த சம்பவம் தொடர்பான புலனாய்வு அறிக்கையை வெளியிட்டுள்ளது. அதில், "இந்திய ஏவுகணை பாகிஸ்தானுக்குள் சென்று விழுந்து, சில மணிநேரங்கள் கடந்தும் கூட இந்திய ராணுவக் கமாண்டர்கள், பாகிஸ்தானில் உள்ள ராணுவத் தலைமையகத்தை தொடர்பு கொண்டு விளக்கம் அளிக்கவில்லை. இதனால், பாகிஸ்தான் ராணுவம் இதற்கு பதிலடி கொடுக்க தயாராகியது. இந்தியாவில் இருந்து வந்த ஏவுகணைக்கு இணையாக மற்றொரு ஏவுகணையை இந்தியப் பகுதியில் வீசவும் பாகிஸ்தான் முடிவு செய்தது. ஆனால், சம்பவத்தின் தன்மையை ஆராய்ந்ததில் இது வேண்டுமென்றே நடந்தது அல்ல என பாகிஸ்தானுக்கு தெரியவந்தது. பின்னரே, பதிலடி கொடுக்கும் முடிவை கைவிட்டது" எனத் தெரிவிக்கப்பட்டுள்ளது.
http://dlvr.it/SLq9zL

Read More

இன்ஸ்டாகிராமில் NFT விற்பனையை விரைவில் தொடங்க மார்க் ஜுக்கர்பெர்க் திட்டம்!

இன்றைய டிஜிட்டல் உலக மக்கள் அனைவரும் NFT (Non Fungible Token) குறித்து அறிந்திருக்க வாய்ப்புள்ளது. இந்நிலையில், போட்டோ மற்றும் வீடியோ ஷேரிங் சமூக வலைதளமான இன்ஸ்டாகிராமில் NFT விற்பனையை தொடங்க மார்க் ஜுக்கர்பெர்க் திட்டமிட்டுள்ளதாக தகவல் வெளியாகியுள்ளது. இதன் மூலம் இனி இன்ஸ்டா பயனர்களும் அந்த தளத்தில் ஊடாக NFT-களை மின்ட் செய்யலாம் என தெரிகிறது. இதனை மார்க் ஜுக்கர்பெர்க் தனது அண்மைய உரையாடலில் தெரிவித்துள்ளார்.  கடந்த டிசம்பரில் இது குறித்த பேச்சு எழுந்திருந்தது. இருந்தாலும் இதற்கான பணிகள் தற்போது நடந்து வருவதாகவும். அது கூடிய விரைவில் தங்கள் தளத்தில் அனைவருக்கும் கிடைக்கும் எனவும் அவர் தெரிவித்துள்ளார். முன்னதாக ட்விட்டர் நிறுவனம் தங்கள் தளத்தில் சில பயனர்கள் மட்டும் அவர்களிடம் உள்ள NFT-யை புரொஃபைல் படமாக வைத்துக் கொள்ளும் அம்சத்தை வழங்கி இருந்தது.  NFT? நம்மிடம் உள்ள போட்டோ, ஓவியங்கள் என பல்வேறு விதமான கலை படைப்புகள் அனைத்தையும் டிஜிட்டல் வடிவில் தனித்துவமாக பதிவு செய்வது தான் NFT. கிட்டத்தட்ட இது ஒரு காப்புரிமை போல. உதாரணமாக மோனோலிசா படத்தை ஓவியர் டாவின்சி வரைந்தார் என்பதை உலகமே அறியும். இருந்தாலும் அந்த படம் பல்வேறு இடங்களில் உள்ள சுவர்களில் அழகுக்காக தொங்கவிடப்பட்டிருக்கும். அது பலரது கைகளில் இருந்தாலும் அந்த படத்தை வரைந்தவர் டாவின்சி. அது போல தான் NFT-யும். ஆனால் இது அப்படியே டிஜிட்டல் வடிவில் இருக்கும் அவ்வளவு தான். அதை படைத்தவர் தனக்கு தேவைப்படும் நேரத்தில் அடுத்தவர்களுக்கு விற்பனை செய்யலாம். அப்படி செய்து விட்டால் அந்த படைப்பின் உரிமை அதை வாங்கியவருக்கு சென்றுவிடும். 
http://dlvr.it/SLp3Tp

Read More

உ.பி: யோகி அமைச்சரவையில் முலாயம் சிங் யாதவ் மருமகள், போலீஸ் அதிகாரிகள் - பா.ஜ.க திட்டம்!

உத்தரப்பிரதேசத்தில் சமீபத்தில் நடந்து முடிந்த சட்டமன்றத் தேர்தலில், பா.ஜ.க அமோக வெற்றிபெற்றுள்ளது. இரண்டாவது முறையாக யோகி ஆதித்யநாத் ஹோலி பண்டிகைக்குப் பிறகு முதல்வராகப் பதவியேற்கவிருக்கிறார். புதிய அமைச்சரவையில் யார் இடம் பெற வேண்டும் என்பது குறித்து யோகி ஆதித்யநாத் ஏற்கெனவே பிரதமர் நரேந்திர மோடி, ராஜ்நாத் சிங், அமித் ஷா ஆகியோரை சந்தித்துப் பேசிவிட்டு வந்திருக்கிறார். அதன் அடிப்படையில் அமைச்சரவைப் பட்டியல் தயாரிக்கப்பட்டுவருகிறது. தேர்தலுக்கு முன்பு பா.ஜ.க-வில் இணைந்த சமாஜ்வாடி கட்சியின் நிறுவனர் முலாயம் சிங் யாதவின் மருமகள் அபர்ணா யாதவுக்கு அமைச்சரவையில் வாய்ப்பு கொடுக்க யோகி ஆதித்யநாத் திட்டமிட்டுள்ளார். அபர்ணா யாதவுக்கு சட்டமன்றத் தேர்தலில் போட்டியிட வாய்ப்பு கொடுக்கவில்லை. ஆனால் அவரை சட்டமேலவை உறுப்பினராக்க பா.ஜ.க திட்டமிட்டுள்ளது. யோகி ஆதித்யநாத் இதையடுத்து அவரை அமைச்சராக்க பா.ஜ.க முடிவுசெய்திருப்பதாகக் கூறப்படுகிறது. இதே போன்று காங்கிரஸ் கட்சியிலிருந்து வந்து பா.ஜ.க சார்பாக ரேபரேலி தொகுதியில் போட்டியிட்டு வெற்றிபெற்றுள்ள அதிதி சிங்குக்கும் அமைச்சரவையில் இடம் கொடுக்க யோகி ஆதித்யநாத் திட்டமிட்டுள்ளார். சட்டமன்றத் தேர்தலில் போட்டியிட்டு வெற்றிபெற்றுள்ள போலீஸ் அதிகாரிகள் ராஜேஷ்வர் சிங், ஆசிம் அருண் ஆகியோரும் அமைச்சரவையில் இடம்பெறவிருக்கின்றனர். ஐ.பி.எஸ் அதிகாரி ஆசிம் அருண் தேர்தலில் போட்டியிடவேண்டும் என்பதற்காக வேலையிலிருந்து விருப்ப ஓய்வு பெற்றவர் என்பது குறிப்பிடத்தக்கது. மத்திய அமைச்சர் ராஜ்நாத் சிங் மகன் பங்கஜ் சிங்குக்கு அமைச்சரவையில் இடம் கொடுப்பது குறித்தும் கட்சித் தலைவர்கள் ஆலோசித்துவருகின்றனர். பங்கஜ், நொய்டா தொகுதியில் போட்டியிட்டு வெற்றிபெற்றுள்ளார். ஏற்கெனவே இருந்த அமைச்சர்களில் 15-க்கும் மேற்பட்டோரை மாற்ற யோகி திட்டமிட்டிருப்பதாகக் கூறப்படுகிறது. அவர்களில் 11 பேர் யோகி அமைச்சரவையில் இடம்பெற்று தேர்தலில் தோல்வியடைந்தவர்கள். அவர்களை சட்டமேலவைக்கு அனுப்புவதில்லை என்று பா.ஜ.க முடிவு செய்துள்ளது. ஆனால், துணை முதல்வராக இருந்த கேசவ் பிரசாத், சமாஜ்வாடி கட்சியின் பல்லவி பட்டேலிடம் தோல்வி அடைந்துள்ளார். அவர் பிற்படுத்தப்பட்டவர்களின் தலைவராகப் பார்க்கப்படுவதால் அவருக்கு மட்டும் அமைச்சரவையில் வாய்ப்பு கொடுக்கப்படும் என்று தெரிகிறது. மேலும், சட்டமன்றத் தேர்தலில் 9-வது முறையாக வெற்றிபெற்றிருக்கும் சுரேஷ் கண்ணா என்பவரை இந்த முறை அமைச்சரவையில் சேர்க்க முடிவு செய்யப்பட்டுள்ளது. யோகி ஆதித்யநாத்தின் மீடியா ஆலோசகர் சலாப் மணி திரிபாதியும் அமைச்சரவையில் இடம்பெறுவார் என்று எதிர்பார்க்கப்படுகிறது. உ.பி: தேர்தல் களத்தில் `புல்டோசர் பாபா'வாக மாறிய யோகி ஆதித்யநாத்! - பின்னணி என்ன?
http://dlvr.it/SLnTXH

Read More

``இஸ்லாமியர்களுக்கு எதிரான செயல்களை பாஜக அரசு ஊக்குவிக்கிறது" - அசாதுதீன் ஒவைசி காட்டம்

கர்நாடகாவில் தொடங்கி இந்தியா முழுவதும் பரபரப்பாக பேசப்பட்டு வந்த ஹிஜாப் விவகாரத்தில், கர்நாடக உயர் நீதிமன்றம் நேற்று தீர்ப்பு வழங்கியது. அதில் ``ஹிஜாப் தடைக்கு எதிராகச் சரியான முகாந்திரங்கள் முன்வைக்கப்படவில்லை. மேலும் ஹிஜாப் அணிவது இஸ்லாமிய சட்டப்படி அத்தியாவசியமானதும் அல்ல. இதனால் கர்நாடக மாநிலத்தில் கல்வி நிலையங்களில் ஹிஜாப் அணிய விதிக்கப்பட்ட தடை செல்லும்" என கர்நாடக உயர் நீதிமன்ற அமர்வு தீர்ப்பளித்தது. இந்த நிலையில், நாடாளுமன்ற உறுப்பினரும், AIMIM கட்சியின் தலைவருமான அசாதுதீன் ஒவைசி, ஹிஜாப் விவகாரத்தில் கர்நாடக உயர் நீதிமன்றத்தின் தீர்ப்பு குறித்து, தனியார் ஊடகமான NDTV-க்கு நேற்று பேட்டியளித்திருந்தார்.ஹிஜாப் விவகாரம் அப்போது பேசிய அசாதுதீன் ஒவைசி, ``நீங்கள் இந்திய அரசியலமைப்புச் சட்டத்தைப் பார்த்தால், பன்மைத்துவம் மற்றும் பன்முகத்தன்மை ஆகியவை நம் அரசியலமைப்பின் அடிப்படை கட்டமைப்புகளாக உள்ளன. அதில் ஒரே மாதிரியான தன்மை இல்லை. சமூக அமைதி, நல்லிணக்கத்தைச் சீர்குலைக்கும் வகையில் செயல்படுவதற்கான சாத்தியக்கூறுகளை உயர் நீதிமன்றம் இன்று பரிந்துரைத்துள்ளது. இது மதம் மற்றும் சாதியின் அடிப்படையில் பாகுபாடு காட்டக்கூடாது என்று கூறும் அரசியலமைப்பின் 15-வது பிரிவை மீறுவதாகும். இஸ்லாமியர்களுக்கு எதிரான செயல்களை தொடர்ந்து பா.ஜ.க அரசாங்கம் ஊக்குவிக்கிறது" என கூறினார்.``ஹிஜாப் அணியாமல் கல்லூரிக்குச் செல்லமாட்டோம்!" - நீதிமன்ற தீர்ப்பை எதிர்த்து மாணவிகள் மேல்முறையீடு
http://dlvr.it/SLn1dX

Read More

``ஹிஜாப் அணியாமல் கல்லூரிக்குச் செல்லமாட்டோம்!" - நீதிமன்ற தீர்ப்பை எதிர்த்து மாணவிகள் மேல்முறையீடு

கர்நாடகத்தில் அந்த மாநில அரசு ஹிஜாபுக்கு தடைவிதித்ததை எதிர்த்து, கல்லூரி மாணவிகள் 6 பேர் கர்நாடகா உயர் நீதிமன்றத்தில் வழக்கு தொடர்ந்தனர். இந்த வழக்கை இன்று விசாரித்த நீதிபதிகள், ``மாநில அரசின் ஹிஜாப் தடைக்கு எதிரான வாதத்தில், சரியான முகாந்திரங்கள் முன்வைக்கப்படவில்லை. மேலும், ஹிஜாப் அணிவது இஸ்லாமிய சட்டப்படி அத்தியாவசியமானதும் அல்ல" எனக் கூறி ஹிஜாப் தடைக்கு எதிராக தொடரப்பட்ட வழக்கை தள்ளுபடி செய்து உத்தரவிட்டனர்.டெல்லி உச்ச நீதிமன்றம் ஹிஜாப் விவகாரத்தில் நீதிமன்றம் வழங்கியிருக்கும் தீர்ப்புக்கு பல்வேறு தரப்பினரும் கலவையான கருத்துகளை தெரிவித்து வருகின்றனர். இந்த நிலையில், கல்வி நிலையங்களில் ஹிஜாப் அணிவதற்கு தடை விதித்தது செல்லும் என கர்நாடக உயர் நீதிமன்றம் பிறப்பித்திருக்கும் தீர்ப்பை எதிர்த்து, 6 மாணவிகள் உச்ச நீதிமன்றத்தில் மேல்முறையீடு செய்துள்ளனர். இது தொடர்பாக அந்த மாணவிகள், ``எங்களுக்கு நீதி கிடைக்கவில்லை, ஹிஜாப் அணியாமல் கல்லூரிக்குச் செல்ல மாட்டோம்" என்றதாகக் கூறப்படுகிறது.``ஹிஜாப் அணிவது இஸ்லாமிய சட்டப்படி அத்தியாவசிய விஷயமல்ல!"-கர்நாடக உயர் நீதிமன்றத் தீர்ப்பு விவரங்கள்
http://dlvr.it/SLmgmw

Read More

'சட்டம் எல்லாவற்றையும் விட பெரியது' - ஹிஜாப் தீர்ப்பு குறித்து அமைச்சர் கருத்து

ஹிஜாப் தொடர்பாக கர்நாடக உயர் நீதிமன்றம் அளித்த தீர்ப்பு வரலாற்றுச் சிறப்புமிக்கது என அம்மாநில கல்வி அமைச்சர் நாகேஷ் கூறியுள்ளார். இது குறித்து ட்விட்டரில் பதிவிட்டுள்ள அவர் சட்டம் எல்லாவற்றையும் விட பெரியது என உணர்த்துவதாக குறிப்பிட்டுள்ளார். எனினும் கர்நாடக உயர் நீதிமன்றத்தின் தீர்ப்பு மிகுந்த ஏமாற்றம் தருவதாக காஷ்மீர் முன்னாள் முதல்வரும் மக்கள் ஜனநாயக கட்சி தலைவருமான மெகபூபா முஃப்தி தெரிவித்துள்ளார். ஒருபுறம் பெண்ணுரிமை பேசும் நாம் மறுபுறம் அவர்கள் உரிமையை மறுக்கிறோம் என்று ட்விட்டரில் மெகபூபா பதிவிட்டுள்ளார். இவ்விவகாரம் மதம் தொடர்பானது மட்டுமல்ல என தெரிவித்துள்ள அவர், விரும்பியதை பின்பற்றக்கூடிய சுதந்திரம் என்ற கோணத்திலும் பார்க்கவேண்டும் என மெகபூபா தெரிவித்துள்ளார்.
http://dlvr.it/SLkSQ3

Read More

``ஹிஜாப் ஆடை பற்றியதல்ல... பெண்களின் உரிமையைப் பற்றியது" - உமர் அப்துல்லா காட்டம்!

இந்தியா முழுவதும் பெரும் அதிர்வலைகளை ஏற்படுத்தியிருக்கும் ஹிஜாப் விவகாரம் தொடர்பாகக் கர்நாடகா உயர் நீதிமன்றம் இன்று தீர்ப்பு வழங்கியிருக்கிறது. ``ஹிஜாப் தடைக்கு எதிராகச் சரியான முகாந்திரங்கள் முன்வைக்கப்படவில்லை. ஹிஜாப் அணிவது இஸ்லாமிய சட்டப்படி அத்தியாவசியமானதும் அல்ல" எனக் கூறி தீர்ப்பு வழங்கியிருக்கிறது.ஹிஜாப் இந்த நிலையில், பல்வேறு அரசியல் கட்சித் தலைவர்களும் இந்த தீர்ப்பு தொடர்பாக மாறுபட்ட கருத்துக்களைத் தெரிவித்து வருகின்றனர். அந்த வகையில், ஜம்மு-காஷ்மீர் மாநில முன்னாள் முதல்வர் உமர் அப்துல்லா இது குறித்து தனது ட்விட்டர் பக்கத்தில், ``கர்நாடக உயர் நீதிமன்றத்தின் தீர்ப்பு மிகுந்த ஏமாற்றத்தை அளித்துள்ளது. ஹிஜாப் என்பது ஒரு ஆடை பற்றிய விஷயம் மட்டுமல்ல. அது ஒரு பெண் எத்தகைய ஆடையை அணிய விரும்புகிறாள் என்பதைத் தேர்ந்தெடுக்கும் அந்தப் பெண்ணின் உரிமையைப் பற்றியது. ஆனால், இந்த அடிப்படை உரிமையை நீதிமன்றம் நிலைநாட்டத் தவறியது கேலிக்கூத்து'' என்று பதிவிட்டிருக்கிறார். Very disappointed by the verdict of the Karnataka High Court. Regardless of what you may think about the hijab it’s not about an item of clothing, it’s about the right of a woman to choose how she wants to dress. That the court didn’t uphold this basic right is a travesty.— Omar Abdullah (@OmarAbdullah) March 15, 2022 ``காஷ்மீருக்கு வந்தநிலை தமிழ்நாட்டுக்கு வராது என்பதில் என்ன நிச்சயம்?" - உமர் அப்துல்லா
http://dlvr.it/SLkS85

Read More

மும்பை, டெல்லி, குஜராத்தில் அனல் காற்று; எச்சரிக்கை விடுத்த வானிலை ஆய்வு மையம்!

வடமாநிலங்களில் தற்போது வெயில் சுட்டெரிக்கிறது. குறிப்பாக மும்பை, டெல்லி, ராஜஸ்தான், குஜராத் போன்ற பகுதிகளில் எப்போதும் இல்லாத அளவுக்கு வெயில் அதிகமாக இருக்கிறது. டெல்லியில் தற்போது 33 டிகிரி செல்சியஸ் வெப்ப நிலை பதிவாகி இருக்கிறது. இது 18-ம் தேதி வரை தொடரும் என்றும், அதன்பிறகு 19-ம் தேதிக்கு பிறகு தற்போதுள்ள வெப்பத்தின் அளவு மேலும் அதிகரிக்கும் என்றும் வானிலை ஆய்வு மையம் தெரிவித்துள்ளது. மும்பையில் தற்போது 39.7 டிகிரி வெப்பம் பதிவாகியிருக்கிறது. இது வழக்கத்தை விட 8 டிகிரி செல்சியஸ் அதிகம் ஆகும். மும்பை மற்றும் அதன் அருகில் உள்ள தானே, பால்கர், ராய்கட் போன்ற பகுதிகளில் அனல் காற்று அடிக்கும் என்று எச்சரிக்கை விடப்பட்டுள்ளது. கடந்த ஆண்டு மார்ச் மாதம் 28-ம் தேதி 40.9 டிகிரி வெப்பம் பதிவாகி இருந்தது. அதிகபட்சமாக கடந்த 1956-ம் ஆண்டு மார்ச் 18-ம் தேதி 41.7 டிகிரி வெப்பம் பதிவாகி இருந்தது.அனல் காற்று குஜராத்தில் அனல் காற்று வீசும் என்று வானிலை ஆய்வு மையம் தெரிவித்திருப்பதோடு, மஞ்சள் எச்சரிக்கையும் விடுத்துள்ளது. சவுராஷ்டிரா பகுதியில் வெயிலின் தாக்கம் மிகவும் அதிகமாக இருக்கும் என்று அறிவிக்கப்பட்டுள்ளது. ராஜஸ்தானின் தென்மேற்கு பகுதியிலும் இந்த அனல் காற்று கடுமையாக இருக்கும் என்று வானிலை ஆய்வு மையம் தெரிவித்துள்ளது. ராஜஸ்தானில் 40 டிகிரிக்கும் அதிகமாக தற்போது வெப்பநிலை இருக்கிறது. இதனால் மக்கள் பகல் நேரத்தில் தேவையில்லாமல் வெளியில் வரவேண்டாம் என்று வானிலை ஆய்வு மையம் தெரிவித்துள்ளது. தேவையான அளவு தண்ணீர் குடிக்கும்படி டாக்டர்கள் தெரிவித்துள்ளனர். விற்பனைக்கு வந்த `புஷ்பா' சேலை; குஜராத் நபரின் டிரெண்டி ஐடியா!
http://dlvr.it/SLjtt0

Read More

`தி காஷ்மீர் ஃபைல்ஸ்’: மோடி, கங்கனா முதல் ஹெச். ராஜா வரை பாராட்டும்... சர்ச்சையும்! - ஓர் பின்னணி

தி காஷ்மீர் ஃபைல்ஸ்: பாலிவுட் இயக்குநர் விவேக் அக்னிஹோத்ரி இயக்கத்தில், கடந்த வெள்ளிக்கிழமை திரையரங்குகளில் வெளியாகி ஓடிக்கொண்டிருக்கும் படம் `தி காஷ்மீர் ஃபைல்ஸ்'. இதில், அனுபம் கெர், பல்லவி ஜோஷ், பாஷா சும்ப்லி, தர்ஷன் குமார் உள்ளிட்ட பலர் நடித்திருக்கின்றனர். இந்த திரைப்படம், 1990-களின் காலகட்டத்தில் காஷ்மீரில் இந்து பண்டிட்களுக்கு எதிராக நடத்தப்பட்ட தீவிரவாதத் தாக்குதல்களையும், அதனால் பாதிக்கப்பட்ட பண்டிட்கள் காஷ்மீரை விட்டுவெளியேறி அண்டை மாநிலங்களுக்கு இடம்பெயர்ந்த உண்மை சம்பவங்களையும் அடிப்படையாகக்கொண்டு உருவாக்கப்பட்டிருக்கிறது. படத்தின் ட்ரைலர் வெளியானபோதே, இந்துக்களை இஸ்லாமியர்கள் தாக்குவதுபோன்றும், இந்து-இஸ்லாமியர்களுக்கிடையே வெறுப்புணர்வை தூண்டும்விதமாக இருப்பதாகவும் பல்வேறு சர்ச்சைகள் கிளம்பின. தற்போது படம் வெளியாகியிருக்கும் சூழ்நிலையில் மேலும் சர்ச்சை வெடித்து, பெரும் விவாதப்பொருளாக மாறியிருக்கிறது. இதன் பின்னணி என்ன? தடை விதிக்கக்கோரி வழக்கு: முதல் பிரச்னையாக, தி காஷ்மீர் ஃபைல்ஸ் படத்துக்குத் தடைவிதிக்கவேண்டும் எனக்கோரி மும்பை உயர் நீதிமன்றத்தில் பொதுநல வழக்கொன்று தாக்கல் செய்யப்பட்டது. ஆனால், இந்த வழக்கு நீதிமன்றத்தால் தள்ளுபடி செய்யப்பட்டது. அதன்பிறகு, அடுத்த பிரச்னையாக, `இந்த திரைப்படத்தில் தனது கணவரின் தியாகத்தை கொச்சைப்படுத்தும்படியான காட்சிகள் இடம்பெற்றிருக்கின்றன. தவறாக சித்தரிக்கப்பட்டிருக்கும் இந்த காட்சிகளை நீக்கவேண்டும்' என 1990-களில் தீவிரவாதிகளால் சுட்டுக்கொல்லப்பட்ட விமானப்படை வீரர் ரவி கண்ணாவின் மனைவி நிர்மல் கண்ணா, ஜம்மு மாவட்ட நீதிமன்றத்தில் வழக்கு தொடர்ந்தார். வழக்கு விசாரணையின் முடிவில், மறைந்த விமானப்படை வீரர் ரவி கண்ணாவின் சர்ச்சைக்குரிய காட்சிகளை மட்டும் காட்சிப்படுத்த படக்குழுவினருக்கு நீதிமன்றம் தடை உத்தரவு பிறப்பித்தது. மேலும், திரைப்படம் வெளியாவதற்கு எந்த தடையும் விதிக்கப்படவில்லை. தி காஷ்மீர் ஃபைல்ஸ். இதையடுத்து, மிக நீண்ட இடைவெளிக்குப்பிறகு, கடந்த மார்ச் 11-ம் தேதி திரையரங்குகளில் வெளியானது தி காஷ்மீர் ஃபைல்ஸ். பாராட்டும் பா.ஜ.க குரல்கள்: தி காஷ்மீர் ஃபைல்ஸ் திரைப்படத்தைப் பார்த்த பிரதமர் மோடி, இயக்குநர் விவேக் அக்னிஹோத்ரி உள்ளிட்ட படக்குழுவினரை நேரில் அழைத்து பாராட்டினார். படக்குழுவினருடன் மோடி பாலிவுட் நடிகை கங்கனா ரணாவத், ``தி காஷ்மீர் ஃபைல்ஸ் படம் குறித்து பாலிவுட்டில் நிலவும் அமைதியை கவனியுங்கள். இந்தப் படம் ஒவ்வொரு கட்டுக்கதையையும் உடைத்துள்ளது. இந்தப் படத்துக்கு எந்த மலிவான விளம்பரமும் செய்யப்படவில்லை. வசூல் குறித்து எந்தவிதமான போலி எண்களும் வெளியாகவில்லை. மாஃபியா தேச விரோத செயல்திட்டங்கள் இல்லை. ஆனாலும் பாலிவுட் இந்தப் படம் குறித்து அமைதியை கடைபிடிப்பது ஏன் என தெரியவில்லை. நாடு மாறும் போது படங்களும் மாறும்" என தனது இன்ஸ்டாகிராம் பக்கத்தில் பாராட்டி கருத்துப் பதிவிட்டிருக்கிறார். அதைத்தொடர்ந்து பாலிவுட் நடிகர் அக்‌ஷய்குமார், ``தி காஷ்மீர் ஃபைல்ஸ் படத்தை பார்க்க மக்கள் அதிகளவில் திரையரங்குகளுக்கு வருவதைப் பார்க்கும்போது மகிழ்ச்சியாக இருக்கிறது. விரைவில் இந்தப் படத்தை பார்ப்பேன்" என ட்விட் செய்திருக்கிறார். கங்கனா ரணாவத் அதேபோல, கிரிக்கெட் வீரர் சுரேஷ் ரெய்னா, ``தி காஷ்மீர் ஃபைல்ஸ் திரைப்படம் உங்களுக்கான படம். இப்படம் உங்களின் இதயத்தை கசக்கிப் பிழியும். ஆகவே, காஷ்மீர் இனப்படுகொலைக்கு நீதி கிடைக்கும் வகையில், நீங்கள் அனைவரும் குரல் கொடுக்க வேண்டும்" என தனது கருத்தை ட்விட்டரில் வெளிப்படுத்தியிருக்கிறார். எச்.ராஜா இதுதவிர, தமிழக பா.ஜ.கவைச் சேர்ந்த ஹெச்.ராஜா, ``Kashmir files என்கிற இந்தி படம் பார்த்தேன். இது சினிமா அல்ல, ஆவணம், சரித்திரம் என்றே கூற வேண்டும். 1990ல் ஃபாரூக் அப்துல்லா தலைமையிலான ஆட்சியில் இந்துக்களுக்கு எதிரான கொலை வன்முறை 5,00,000 க்கும் மேற்பட்ட இந்துக்கள் காஷ்மீரை விட்டு விரட்டியடிக்கப்பட்டது ஆகியவை தத்ரூபமாக காணமுடிகிறது" என கருத்து தெரிவித்திருக்கிறார். வரிச்சலுகைகொடுக்கும் பா.ஜ.க மாநிலங்கள்: இந்தப் படத்தை வெகுவாகப் பாராட்டி, வாழ்த்து தெரிவித்திருக்கும் பா.ஜ.க. ஆளும் மாநில முதல்வர்கள், வரிச்சலுகையும் கொடுத்து ஆதரவு தெரிவித்திருக்கின்றனர். அந்த வகையில், ஹரியானா, குஜராத், மத்தியப் பிரதேசம் உள்ளிட்ட மாநிலங்கள் 100% வரிவிலக்கு அளித்திருக்கின்றன. சிவராஜ் சிங் சௌகான் மேலும், ம.பி. முதல்வர் சிவராஜ் சிங் சௌகான், ``90-களில் காஷ்மீரை சேர்ந்த இந்து மக்கள் எதிர்கொண்ட சம்பவங்களை அப்படியே கண்முன்னே கொண்டு வந்துள்ளது ‘தி காஷ்மீர் ஃபைல்ஸ்’. இந்த படத்தை பெருவாரியான மக்கள் பார்க்க வேண்டும். அதனால் மத்திய பிரதேச மாநிலத்தில் இதற்கு வரிவிலக்கு கொடுக்கிறோம்” என தெரிவித்திருப்பதோடு, `இந்த திரைப்படத்தைக் காண்பதற்காக, மாநில காவல்துறையினர் அனைவருக்கும் விடுமுறை அளிக்கப்படும்' எனவும் அதிரடியாக அறிவித்திருக்கிறார்.கேரள காங்கிரஸ் எழுந்திருக்கும் எதிர்ப்புக் குரல்கள்: இந்த நிலையில், பா.ஜ.க-வினருக்கு பதில்தரும் விதமாக கேரள காங்கிரஸ் கமிட்டி, ``#Kashmir_Files vs Truth (காஷ்மீர் பண்டிட் விவகாரம் பற்றிய உண்மைகள்)" எனும் தலைப்பில் 9 எதிர்கருத்துக்களை தனது ட்விட்டரில் வெளியிட்டிருக்கிறது. வி.பி. சிங் மற்றும் பாஜக தலைவர்கள் அதில், `` 1989 டிசம்பரில் பா.ஜ.க ஆதரவுடன் வி.பி.சிங் அரசு ஆட்சிக்கு வந்தது. பி.ஜே.பி ஆதரவு பெற்ற வி.பி.சிங் அரசாங்கத்தின் கீழ் அடுத்த மாதம் ஜனவரி 1990-ல் பண்டிட்களின் இடப்பெயர்வு தொடங்கியது. அப்போது, பா.ஜ.க ஒன்றுமே செய்யவில்லை, நவம்பர் மாதம் 1990 வரை வி.பி.சிங்கிற்கு ஆதரவைத் தொடர்ந்து வழங்கியது. மேலும், ஆர்.எஸ்.எஸ்.காரரான கவர்னர் ஜக்மோகனின் வழிகாட்டுதலின்படிதான் பண்டிதர்கள் ஒட்டுமொத்தமாக பள்ளத்தாக்கை விட்டு வெளியேறினார்கள். பயங்கரவாதத் தாக்குதலுக்குப் பிறகு, பண்டிட்களுக்குப் பாதுகாப்பை வழங்குவதற்குப் பதிலாக, பா.ஜ.க-வின் சொந்த ஆளுநர் ஜக்மோகன் அவர்களை ஜம்முவுக்கு இடம்மாறச் சொன்னார். ஏராளமான பண்டிட் குடும்பங்கள் பாதுகாப்பாக உணரவில்லை எனவே பயத்தில் பள்ளத்தாக்கை விட்டு வெளியேறினார்கள்" என தெரிவித்திருக்கிறது. மேலும்,``இந்த இடப்பெயர்வின்போது அயோத்தியில் ராமர் கோயில் பிரச்னையில் பாஜக நாட்டில் இந்து-முஸ்லிம் பிரிவினையை ஏற்படுத்தியது. அதைத்தொடர்ந்து, தேர்தல் ஆதாயத்திற்காக ஒரு போலி சீற்றத்தை உருவாக்க பா.ஜ.க-வின் பிரசாரத்திற்கு பண்டிட்களின் பிரச்னை கையிலெடுத்தது. இடம்பெயர்ந்த பண்டிட் குடும்பங்களுக்கு அரசாங்கத்தின் ஆதரவைப் பற்றி பா.ஜ.க பொய்கூறி வருகிறது. இப்படி, பண்டிட்களுக்காக முதலைக் கண்ணீர் வடிக்கும் பாஜக, மத்தியில் இரண்டு முறையும், காஷ்மீரில் ஒரு முறையும் ஆட்சியில் இருந்தும் அவர்களை காஷ்மீருக்கு அழைத்து வரவோ, குடியமர்த்தவோ இல்லை" என குற்றம் சாட்டியிருக்கிறது.தி காஷ்மீர் ஃபைல்ஸ் கேரள காங்கிரஸ்க்கு அனுபம் கெர் பதிலடி: தி காஷ்மீர் ஃபைல்ஸ் படத்தில், முக்கியக் கதாபாத்திரமாக (பண்டிட்டாக) நடித்திருக்கும் பாலிவுட் நடிகர் அனுபம் கெர், ``இது சாதாரண திரைப்படம் அல்ல. இது ஒரு இயக்கம். 32 ஆண்டுகளுக்கு முன்னர் நடைபெற்ற கோர சம்பவத்தை கண்முன்னே கொண்டு வந்துள்ளது இந்த திரைப்படம். இப்படியிருக்கும்போது, இதுகுறித்து கொஞ்சம் கூட யோசிக்காமல் கேரள காங்கிரஸ் அபத்தமான கருத்துகளை வெளியிட்டுவருகிறது. இந்திரா காந்தி, ராஜீவ் காந்தி என ஒரே குடும்பத்தை சேர்ந்த இரண்டு பிரதமர்களை பயங்கரவாதத்திற்கு பலி கொடுத்த கட்சி காங்கிரஸ். அதனால் அவர்கள் இதை சொல்லக்கூடாது என நினைக்கிறேன். இந்த படம் குறித்து எழுப்பப்படும் சர்ச்சைகளில் கவனம் செலுத்த நான் விரும்பவில்லை" என தெரிவித்திருக்கிறார்.தி காஷ்மீர் ஃபைல்ஸ் படத்தில் அனுபம் கெர் தொடரும் சர்ச்சை: கேரள காங்கிரஸைப் போலவே பல்வேறு எதிர்க்கட்சியினர், சிறுபான்மையினர் மற்றும் அரசியல் செயற்பாட்டாளர்கள் உள்ளிட்ட பலரும் `பா.ஜ.க உண்மைக்கு புறம்பாக இந்தப் படத்தை வைத்து அனுதாப அரசியல் செய்கிறது' என எதிர்மறையாக விமர்சனம் செய்துவருகின்றனர். மறுபுறம் திரைப்படதிற்கு பாராட்டும், வரவேற்பும் கிடைத்தவண்ணம் இருக்கிறது. தற்போது, #KashmirFilesMovie, #Islamophobia உள்ளிட்ட ஹேஷ்டேகுகள் இரண்டு தரப்பிலிருந்தும் ட்விட்டர் ட்ரென்டிங் செய்யப்பட்டு வருகின்றன.
http://dlvr.it/SLjRFQ

Read More

``ஆற்றலுடனும் சுறுசுறுப்புடனும் இயங்கக்கூடிய திறன்கொண்ட மனிதர் மோடி!" - காங்., எம்.பி சசி தரூர்

நடந்து முடிந்த ஐந்து மாநில சட்டமன்றத் தேர்தலில், பா.ஜ.க உத்தரப்பிரதேசம், உத்தரகாண்ட், மணிப்பூர், கோவா ஆகிய மாநிலங்களில் வெற்றிபெற்றது. பஞ்சாப்பில் மட்டும் ஆம் ஆத்மி வெற்றிபெற்றுள்ளது. மேலும் காங்கிரஸ் ஐந்து மாநிலங்களில் ஒன்றில்கூட வெற்றி பெறாமல் தோல்வியடைந்துள்ளது. காங்கிரஸின் இத்தகைய தோல்வி பலராலும் விமர்சிக்கப்பட்டுவருகிறது. இந்த நிலையில் காங்கிரஸ் எம்.பி சசி தரூர், ``பிரதமர் நரேந்திர மோடி அளப்பரிய ஆற்றலும், சுறுசுறுப்பும்கொண்டவர்" என மோடிக்குப் புகழாரம் சூட்டியுள்ளார். நேற்று ஜெய்ப்பூரில் நடைபெற்ற இலக்கிய விழாவின்போது செய்தியாளர்களிடம் பேசிய சசி தரூர், ``பிரதமர் நரேந்திர மோடி அளப்பரிய ஆற்றலும், சுறுசுறுப்பும்கொண்டவர். குறிப்பாக அரசியல்ரீதியாக மிகவும் ஈர்க்கக்கூடிய சில விஷயங்களைச் செய்திருக்கிறார்.பிரதமர் மோடி அவர் இவ்வளவு பெரிய வாக்கு வித்தியாசத்தில் வெற்றிபெறுவார் என்று நாங்கள் எதிர்பார்க்கவில்லை. ஆனால் அதை அவர் செய்துகாட்டியிருக்கிறார். உத்தரப்பிரதேச மக்கள் இன்று அவர்களுக்கு விரும்பியதை வழங்கியுள்ளனர். அதேசமயம், நம் நாட்டை வகுப்புவாதத்தாலும், மத அடிப்படையிலும் பிளவுபடுத்தும் சக்திகளை மோடி சமூகத்தில் கட்டவிழ்த்துவிட்டிருக்கிறார். அது என்னைப் பொறுத்தவரை துரதிர்ஷ்டவசமானது" என்றார்.``ஏழைகள் உரிமைகளைப் பெறும் வரை நான் ஓய்வெடுக்கப் போவதில்லை!" - வெற்றி கூட்டத்தில் பிரதமர் மோடி
http://dlvr.it/SLj5rJ

Read More

திருவிழா வீதியில் பழங்குடி பெண்ணுக்கு கூட்டு பாலியல் கொடுமை; ம.பி-யில் நடந்த கொடூரம்!

மத்திய பிரதேசத்தின் பால்பூர் கிராமத்தில் திருவிழாவின்போது இளைஞர்கள் பலர் சாலையில் நடந்து சென்ற இளம்பெண்ணுக்கு பாலியல் தொல்லை அளித்த வீடியோ சமூக வலைதளங்களில் வைரலாகி வருகிறது. மத்திய பிரதேசத்தின் அலிராஜ்பூர் மாவட்டத்தின் பால்பூர் கிராமத்தில் பழங்குடியின மக்களின் பிரசித்திப் பெற்ற பகோரியா திருவிழா, கடந்த மார்ச் 11-ம் தேதியன்று நடைபெற்றது. இந்த திருவிழாவானது அறுவடை மற்றும் நன்றி தெரிவிக்கும் பெருவிழாவாக மாநிலம் முழுவதும் கொண்டாடப்படுகிறது.Sexual Harassmentபேருந்தில் பழங்குடியின பெண் கூட்டு பாலியல்வதை; ஓட்டுநர் கைது, தப்பியோடிய நடத்துநர்; ம.பி. அதிர்ச்சி! திருவிழாக் கொண்டாட்டங்களின்போது, பால்பூர் கடை வீதியில் பழங்குடி இனத்தை சேர்ந்த இளம்பெண் ஒருவர் தனியாக நடந்து சென்றுள்ளார். திருவிழா என்பதால் மக்கள் கூட்டத்துடன் பரபரப்பாக காணப்பட்ட வீதியில், இளைஞர்கள் திரளாக அந்தப் பெண்ணை பின் தொடர்ந்துள்ளது வீடியோ காட்சிகளின் மூலம் தெரிய வருகிறது. உடனே அந்த இளைஞர்களில் சிலர், தனியாகச் சென்ற அந்த இளம்பெண்ணை வழிமறித்துப் பாலியல் தொல்லை அளித்துள்ளனர். இளைஞர்கள் தொடர்ச்சியாக, பல நிமிடங்கள் அந்த இளம்பெண்ணுக்கு பாலியல் தொல்லை அளித்து வந்த நிலையில், இளைஞர் ஒருவர் அந்தப் பெண்ணை இளைஞர்கள் கூட்டத்துக்குள் தள்ள, கூட்டத்தில் உள்ள அனைவரும் பாலியல் தொல்லையில் ஈடுபட்டுள்ளனர். இந்தச் சம்பவத்தை அந்த இளைஞர்களில் பலரும், திருவிழா கூட்டத்தின் பெரும் பகுதியினரும் தங்களது செல்போனில் வீடியோவாகப் பதிவு செய்துள்ளனர். அப்போது, ஒருவர் கூட அந்தப் பெண்ணுக்கு ஆதரவாகக் குரல் கொடுக்கவில்லை, நடந்த அநியாயத்தைத் தட்டிக் கேட்கவில்லை என்பது அவலம். இந்தக் காட்சிகள் அடையாளம் தெரியாத நபர் ஒருவரால் வீடியோவாக பதிவு செய்யப்பட்டு, பின் ட்விட்டரில் பகிரப்பட்டுள்ளது.Violence against women (Representational Image)அரசுப் பேருந்திலிருந்து இறக்கிவிடப்பட்ட நாடோடி பழங்குடியின குடும்பம்; ஓட்டுநர், நடத்துநர் சஸ்பெண்ட்! இது குறித்து செய்தி வெளியிட்டுள்ள Free Press Journal செய்தி நிறுவனம், இளம்பெண்ணுக்கு பாலியல் தொல்லை அளித்த இளைஞர்கள் அதே கிராமத்தைச் சார்ந்தவர்கள் எனவும், அவர்கள் மீது வழக்குப்பதிவு செய்யப்பட்டுள்ளதாகவும், அவர்களில் சிலரை அடையாளம் கண்டுவிட்டதாகவும் மாவட்ட போலீஸ் சூப்பிரடண்டென்டன்ட் மனோஜ் சிங் தெரிவித்ததாகக் குறிப்பிட்டுள்ளது. இந்நிலையில், இந்த சம்பவம், மத்திய பிரதேசத்தில் பெண்களுக்கான பாதுகாப்பின் அளவீட்டை கேள்விக்குறியாக்கி உள்ளது.
http://dlvr.it/SLg0P4

Read More

‘தாய்மாமனை மிஞ்சிய உறவேது’- நினைவாலே சிலை செய்து நடைபெற்ற காதணி விழா

ஒட்டன்சத்திரத்தில் தாய்மாமன் உருவச் சிலையின் மடியில் அமர்ந்து வினோதமாக காதணி விழா நடைபெற்றது. திண்டுக்கல் மாவட்டம் ஒட்டன்சத்திரம் வினோபா நகரைச் சேர்ந்த சௌந்தர பாண்டி - பசுங்கிளி தம்பதியினரின் மகன் பாண்டித்துரை. இவர், கடந்த 2 ஆண்டுகளுக்கு முன்பு விபத்து ஒன்றில் இறந்து போனார். இந்நிலையில், அவருடைய மூத்த சகோதரி பிரியதர்ஷினியின் மகள் தாரிகா ஸ்ரீ. மகன் மோனேஷ் குமரன் ஆகியோரது காதணி விழா ஒட்டன்சத்திரத்தில் நடைபெற்றது. இந்நிலையில், பாண்டித்துரை இறந்து போனதால் அவருடைய மெழுகு உருவச் சிலையை வைத்து தாய்மாமன் செய்முறைகள் செய்யப்பட்டு அவரது சிலையின் மடியில் குழந்தைகளை அமரவைத்து காது குத்தப்பட்டது. இதற்கு முன்னதாக தாய்மாமன் மெழுகு சிலை குதிரைகள் பூட்டப்பட்ட சாரட் வண்டியில் ஊர்வலமாக திருமண மண்டபத்திற்கு எடுத்து வரப்பட்டது. அக்காள் குழந்தைகளுக்கு தன்னுடைய மடியில் வைத்து காதணி விழா நடைபெற வேண்டும் என்பது பாண்டித் துரையின் நீண்ட நாள் கனவு. இதைத் தொடர்ந்து பாண்டித் துரையின் விருப்பத்தை நிறைவேற்றும் வகையில் 5 லட்சம் ரூபாய் செலவில் சிலை செய்து குழந்தைகளுக்கு காதணிவிழா நடத்தி மகனின் ஆசையை நிறைவேற்றியதாக குடும்பத்தினர் மகிழ்ச்சியுடன் தெரிவித்தனர். இந்த வினோத நிகழ்வு ஒட்டன்சத்திரம் பகுதி மக்களிடையே பெரும் நெகிழ்ச்சியை ஏற்படுத்தியது.
http://dlvr.it/SLfQvf

Read More

மதுக்கடையில் கல்வீச்சு; ஒரு வாரம் காலக்கெடு - எச்சரிக்கை விடுத்த பா.ஜ.க முன்னாள் அமைச்சர் உமா பாரதி!

மத்தியப் பிரதேசம் பர்கேடா பதானி பகுதியில் உள்ள ஒரு மதுக்கடையில் முன்னாள் மத்திய அமைச்சர் உமா பாரதி கல் வீசித் தாக்குதல் நடத்தியது அரசியல் வட்டாரத்தில் சலசலப்பை ஏற்படுத்தியுள்ளது. கடந்த ஆண்டு பா.ஜ.க-வின் முன்னாள் மத்திய அமைச்சர் உமா பாரதி, ``ஜனவரி 15-ம் தேதிக்குள் மாநிலத்தில் மதுவைத் தடை செய்ய வேண்டும். இல்லையென்றால் தடியால் மதுக்கடைகளை அடித்து நொறுக்குவேன்" என எச்சரித்திருந்தார். இந்த நிலையில், கடந்த சில தினங்களுக்கு முன்பு பர்கேடா பதானி பகுதியில் உள்ள ஒரு மதுக்கடையில் நுழைந்த முன்னாள் மத்திய அமைச்சர் உமா பாரதி மதுக்கடையினுள் கற்களை வீசினார். அதைத் தொடர்ந்து உமா பாரதி ஒரு வீடியோ பேசி வெளியிட்டிருந்தார்.மதுக்கடையில் கல் வீசும் முன்னாள் அமைச்சர் அமைச்சர் உமா பாரதி அந்த வீடியோவில் அவர், ``பர்கேடா பதானி பகுதி காலனியில் ஏராளமான மதுபானக் கடைகள் இருக்கின்றன. அவற்றில் `அஹதா' எனும் தடை செய்யப்பட்ட இடத்தில் மதுபானம் வழங்கப்படுகிறது. இந்த கடைகளில் கூலித்தொழிலாளர்களின் பணம் வீணாகிறது. அரசாங்கத்தின் கொள்கைக்கு எதிராக இந்த மதுபானக்கடைகள் இருப்பதால் அந்தப் பகுதிவாசிகளும், பெண்களும் கடும் எதிர்ப்பு தெரிவித்து போராட்டம் நடத்தினர். ஏற்கெனவே பலமுறை இந்த கடைகளை மூடுவதாக நிர்வாகம் உறுதியளித்தது. ஆனாலும் பல ஆண்டுகளாக அது நடக்கவில்லை. இன்னும் ஒரு வாரத்தில் இந்த கடைகளை மூடுமாறு எச்சரிக்கை விடுத்திருக்கிறேன்" என்று கூறியிருந்தார். This is Uma Bharti’s idea of staying relevant. pic.twitter.com/ePeYTXHD1v— Abhijit Majumder (@abhijitmajumder) March 13, 2022 இந்தச் சம்பவம் நடைபெறுவதற்கு இரண்டு நாள்களுக்கு முன்பு உமா பாரதி, முதல்வர் சிவராஜ் சிங் சவுகானை சந்தித்து, மத்தியப் பிரதேசத்தை மது இல்லாத மாநிலமாக மாற்றக்கோரி கோரிக்கை முன்வைத்தார் என்பது குறிப்பிடத்தக்கது. ஆனால், மத்தியப் பிரதேசத்தில் ஆட்சியிலிருக்கும் பா.ஜ.க முதல்வர் சிவராஜ் சிங் தலைமையிலான அரசு வெளிநாட்டு மதுபானங்கள் மீதான கலால் வரியை 10 முதல் 13 சதவிகிதம் வரை குறைத்தது.மத்திய பிரதேச முதல்வர் சிவராஜ் சிங் சௌகான் மேலும், வெளிநாட்டு மற்றும் உள்நாட்டு மதுபானங்களை ஒரே கடையில் விற்பனை செய்யவும் அனுமதிக்கப்பட்டுள்ளது. தற்போது, மத்தியப் பிரதேசத்தில் 2,544 நாட்டு மதுபானக் கடைகளும், 1,061 வெளிநாட்டு மதுபானக் கடைகளும் உள்ளன. மேலும், திராட்சை தவிர கருப்பு பிளம்ஸிலிருந்து ஒயின் தயாரிக்கவும் மது உற்பத்தியாளர்கள் அனுமதிக்கப்பட்டுள்ளனர். முன்பை விட இப்போது நான்கு மடங்கு மதுபானங்களை மக்கள் வீட்டில் வைத்திருக்கலாம். ஆண்டு வருமானம் ரூ1 கோடி மற்றும் அதற்கு மேல் உள்ளவர்கள் வீட்டிலேயே மதுக்கடை திறக்கவும் அனுமதிக்கப்பட்டுள்ளனர்.உமா பாரதி இது தொடர்பாக மத்தியப் பிரதேச காங்கிரஸ் கட்சியின் மூத்த தலைவர் ஒருவர், ``இந்தச் சம்பவம் மாநிலத்தில் ஆளும் பா.ஜ.க மீது குற்றம்சாட்ட எதிர்க்கட்சியான காங்கிரஸுக்கு வாய்ப்பளித்துள்ளது. ஆனால், மதுக்கடைகளைச் சேதப்படுத்துவதற்குப் பதிலாக, கலால் கொள்கைகள் உருவாக்கப்பட்ட அலுவலகத்தின் மீது அவர் கல்லெறிந்திருக்க வேண்டும்" எனத் தெரிவித்துள்ளார்.ஹத்ராஸ் சம்பவம்: `அவப்பெயர்... சகோதரியாகச் சொல்கிறேன்!' - யோகி ஆதித்யநாத்துக்கு உமா பாரதி அட்வைஸ்
http://dlvr.it/SLfQCS

Read More

நுங்கம்பாக்கம் ரயில் நிலையத்தில் பழுதான 'லிப்ஃட்’ -2 மணி நேரமாக சிக்கித்தவித்த 13 பயணிகள்

சென்னை நுங்கம்பாக்கம் ரயில் நிலையத்தில் மின்தூக்கி பழுதானதால் இரண்டு மணி நேரமாக பயணிகள் மின்தூக்கியினுள் சிக்கித் தவித்தனர்.எப்போதும் பரபரப்பாகவும் நாள்தோறும் ஆயிரக்கணக்கானோர் பயன்படுத்தும் பிரதான இடமாகவும் உள்ளது சென்னை நுங்கம்பாக்கம் ரயில் நிலையம். இங்குள்ள மின்தூக்கியில் நேற்று மாலை குழந்தை உள்பட 13 பேர் சிக்கித்தவித்த நிகழ்வு பரபரப்பை உண்டாக்கியது. ஒன்றரை வயது குழந்தை, 5 பெண்கள் உள்பட 13 பேர் ரயில் நிலையத்திலுள்ள மின்தூக்கியில் சென்றப்போது நடுவில் சிக்கிக்கொண்டனர். இதனையடுத்து மின்தூக்கியில் இருந்த உதவி எண்ணை அழைத்து தகவல் தெரிவித்ததும், சம்பவ இடத்துக்கு விரைந்தது ரயில்வே காவல்துறை மற்றும் தொழில்நுட்பக்குழு. முதல்கட்டமாக மின்தூக்கியை இயக்க மேற்கொள்ளப்பட்ட முயற்சி தோல்வியடைந்தது. இதனையடுத்து தீயணைப்புத்துறையினர் வரவழைக்கப்பட்டு, மின்தூக்கியின் மேல்பகுதியில் இருந்த மின்விசிறியை, உள்ளே இருந்தவர்கள் உதவியுடன் அகற்றினர். பின்னர் கயிறுகட்டி முதலில் பெண் குழந்தையை வெளியே தூக்கினர். அதனைத்தொடர்ந்து ஒருவர்பின் ஒருவராக சுமார் 2 மணிநேத்துக்கு பின் மீட்கப்பட்டனர். நுங்கம்பாக்கம் ரயில் நிலைய மின்தூக்கியை இயக்கவோ அல்லது அதனை பராமரிக்கவோ பணியாளர்கள் யாரும் இல்லையென பயணிகள் தெரிவிக்கின்றனர். அதேநேரத்தில் அதிக பாரம் காரணமாகவே மின்தூக்கி பழுதாகியிருக்கக்கூடும் எனக் கூறப்படுகிறது.நல்வாய்ப்பாக அனைவரும் மீட்கப்பட்டபோதும், இந்த ஒரு நிகழ்வை உதாரணமாக எடுத்துக்கொண்டு மற்ற அனைத்து ரயில் நிலையங்களிலும் மின்தூக்கியை பராமரிக்க தனி பணியாளரை நியமிக்க வேண்டும் என கோரிக்கை எழுந்துள்ளது.இதையும் படிக்க: சாக்கு குடோனில் ஏற்பட்ட தீ விபத்தில் ரூ.10 லட்சம் மதிப்பிலான சாக்குகள் எரிந்து நாசம்
http://dlvr.it/SLdzyp

Read More

உக்ரைனில் தீவிரமடையும் போர் சூழல்: இப்போது எங்கே இருக்கிறது இந்தியத் தூதரகம்?

உக்ரைன் போர் தீவிரமடைந்து வருவதால், அந்நாட்டில் இருந்த இந்தியத் தூதரகம் தற்காலிகமாக போலந்துக்கு இடம்பெயர்ந்துள்ளது. உக்ரைனில் கடந்த மூன்று வாரங்களுக்கும் மேலாக ரஷ்ய படைகள் தாக்குதல் நடத்தி வருகின்றன. முதலில் அந்நாட்டின் தெற்கு மற்றும் வடக்கு பகுதிகளில் உள்ள நகரங்களை குறிவைத்து தாக்கி வந்த ரஷ்ய ராணுவம், தற்போது மேற்கு பகுதி மீது தனது தாக்குதலை ஆரம்பித்துள்ளது. அதேபோல, தலைநகர் கீவ்வுக்கு 25 கிலோமீட்டர் தொலைவில் நிறுத்தி வைக்கப்பட்டிருந்த ரஷ்ய படைகள் தற்போது படிப்படியாக அந்நகரை நோக்கி முன்னேறி வருகின்றன. இதனால் கீவ் நகரம் மீதான தாக்குதலும் அதிகரித்துள்ளது. விரைவில் கீவ் நகரம் ரஷ்ய ராணுவத்திடம் வீழ்ந்துவிடும் என மேற்கத்திய பாதுகாப்பு நிபுணர்கள் தெரிவித்துள்ளனர். இந்நிலையில், தற்காப்பு நடவடிக்கையாக கீவ்வில் செயல்பட்டு வந்த இந்தியத் தூதரகம், அண்டை நாடான போலந்துக்கு தற்காலிகமாக இடம்பெயர்ந்துள்ளது. அங்கு நிலவி வரும் சூழலை பொறுத்து, அடுத்தக்கட்ட நடவடிக்கைகள் குறித்து முடிவு செய்யப்படும் என இந்தியத் தூதரகம் தெரிவித்துள்ளது. உக்ரைன் போர் சூழல் குறித்து பிரதமர் நரேந்திர மோடி தலைமையில் இன்று காலை நடந்த உயர்நிலைக் குழு ஆலோசனைக் கூட்டத்துக்கு பிறகு, உக்ரைன் இந்தியத் தூதரகம் போலந்துக்கு குடிபெயர்ந்தது குறிப்பிடத்தக்கது.
http://dlvr.it/SLdh52

Read More

ஜெர்மன் ஓபன் பேட்மிண்டன்: உலகின் நம்பர் ஒன் வீரரை வீழ்த்திய இந்தியாவின் லக்ஷயா சென்!

20 வயதான இந்தியாவின் இளம் பேட்மிண்டன் வீரர் நடப்பு ஜெர்மன் ஓபன் பேட்மிண்டன் தொடரின் ஆடவர் பிரிவு ஒற்றையர் அரையிறுதி ஆட்டத்தில் உலகின் நம்பர் 1 வீரர் விக்டர் ஆக்சல்செனை (Viktor Axelsen) வீழ்த்தியுள்ளார். 21-13, 12-21, 22-20 என முதல் மற்றும் கடைசி செட்களில் வெற்றி பெற்றுள்ளார் லக்ஷயா சென்.  டென்மார்க் நாட்டை சேர்ந்த விக்டர் ஆக்சல்சென் டோக்கியோ ஒலிம்பிக்கில் தங்கம் வென்றவர் என்பதும் குறிப்பிடத்தக்கது. அவருடன் ஐந்து முறை விளையாடியுள்ள லக்ஷயா சென் தனது முதல் வெற்றியை பதிவு செய்துள்ளார். இறுதிப் போட்டியில் தாய்லாந்து வீரர் Kunlavut Vitidsarn-க்கு எதிராக பலப்பரீட்சை செய்கிறார். இன்று இந்த போட்டி நடைபெறுகிறது.  கடந்த 2021 டிசம்பரில் நடைபெற்ற உலக சாம்பியன்ஷிப் ஆடவர் ஒற்றையர் பிரிவில் வெண்கலம் வென்றிருந்தார் லக்ஷயா சென்.
http://dlvr.it/SLcBgx

Read More

பேருந்தில் பழங்குடியின பெண் கூட்டு பாலியல்வதை; ஓட்டுநர் கைது, தப்பியோடிய நடத்துநர்; ம.பி. அதிர்ச்சி!

மத்திய பிரதேசத்தின் தார் மாவட்டத்தில் பேருந்தில் பயணித்த பழங்குடி இனத்தைச் சேர்ந்த 25 வயது இளம்பெண்ணை பேருந்தில் பயணிகள் யாரும் இல்லாத சூழலைப் பயன்படுத்தி ஓட்டுநர், நடத்துநர் உள்பட மூவர் கூட்டு பாலியல் வன்கொடுமை செய்த சம்பவம் பரபரப்பை ஏற்படுத்தி உள்ளது. மத்திய பிரதேச மாநிலத்தின் தார் மாவட்டத்தை அடுத்த மனவார் பகுதியைச் சேர்ந்த 25 வயதுடைய பழங்குடி இனத்தைச் சேர்ந்த இளம்பெண், கடந்த வெள்ளிக்கிழமை அன்று குக்‌ஷி நிறுத்தத்தில் இருந்து மனவார் நோக்கி செல்லும் தனியார் பேருந்தில் பயணித்துள்ளார். இரவு நேரம் என்பதால் பேருந்தில் குறைந்த அளவிலான பயணிகளே பயணித்துள்ளனர். Sexual Harassment பேருந்து, தனக்குரிய நிறுத்தத்தில் நிற்காமல் சென்றதால் பதற்றத்தில் அந்தப் பெண் கூச்சலிட்டுள்ளார். அவருக்கு ஆதரவாக பேருந்தில் பயணித்த சிலரும் நடத்துநரிடம், ஏன் நிறுத்தத்தில் நிற்காமல் சென்றது எனக் கேள்வி எழுப்பியுள்ளனர். அதற்கு நடத்துநரும் ஓட்டுநரும், அந்தப் பெண்ணை காந்த்வானி பகுதியில் இறக்கி விடுவதாகத் தெரிவித்துள்ளனர். அடுத்த சில நிறுத்தங்களில் பயணிகள் அனைவரும் இறங்கிவிட, பழங்குடியினப் பெண் மட்டும் தனியாகப் பயணித்துள்ளார். அப்போது குலாட்டி - பலிபூர் சாலையின் ஒதுக்குப்புறத்திற்கு திடீரென பேருந்தின் வழிதடத்தை ஓட்டுநர் திசைதிருப்பி உள்ளார். பேருந்தை ஓட்டுநர் ஓரம் கட்டிய நிலையில், நடத்துநர் அப்பெண்ணை பேருந்தினுள் வைத்து பாலியல் வன்கொடுமை செய்துள்ளார். நடத்துநரை அடுத்து, ஓட்டுநரும், க்ளீனரும் அப்பெண்ணை கூட்டு பாலியல் வன்கொடுமை செய்ய முயன்றுள்ளனர். அப்போது, அந்த வழியாக சென்ற சிலர், பெண்ணின் அலறல் சத்தம் கேட்டு பேருந்திற்குள் சென்றுள்ளனர். அப்போது, பெண்ணை பாலியல் வன்கொடுமை செய்த ஓட்டுநரை பிடித்துள்ளனர். மற்ற இருவரும் தப்பியோடிய நிலையில், சம்பவம் தொடர்பாக மனவார் காவல் நிலையத்தில் அப்பெண் புகார் அளித்தார். புகார் பெறப்பட்ட நிலையில், சம்பவ இடத்தில் பிடிபட்ட ஓட்டுநரிடம் விசாரணை நடைபெற்று வருகிறது. தப்பியோடிய நடத்துநரையும், கிளீரனையும் போலீஸார் தீவிரமாகத் தேடி வருகின்றனர். Jail (Representational Image) இந்த நிலையில், அவர்கள் மீது கூட்டு பாலியல் வன்கொடுமை IPC 376, 376 (D), 376(K) பிரிவுகளின் கீழ் வழக்குப் பதிவு செய்யப்பட்டுள்ளது. இதனிடையே, செய்தி நிறுவனம் ஒன்றுக்கு பேட்டி அளித்த தார் மாவட்ட போலீஸ் சூப்பிரண்டெண்டென்ட் ஆதித்ய பிரதாப் சிங், மருத்துவப் பரிசோதனை முடிந்துள்ளதாகவும், அந்தப் பெண் நலமாக உள்ளதாகவும், அவரின் உறவினருடன் அவரை அனுப்பி வைத்துள்ளதாகவும் தெரிவித்தார். இதனிடையே, தனியார் பேருந்தில் பழங்குடியின இளம்பெண் கூட்டு பாலியல் வன்கொடுமைக்கு உள்ளான சம்பவம் மத்திய பிரதேசத்தில் பரபரப்பை ஏற்படுத்தி உள்ளது.
http://dlvr.it/SLbs5Z

Read More

சென்னையில் 2 மெட்ரோ ரயில் நிலையங்கள் இன்று திறப்பு

திருவொற்றியூர் தேரடி மற்றும் விம்கோ நகர் பணிமனை ஆகிய மெட்ரோ ரயில் நிலையங்கள் இன்று முதல் பொதுமக்கள் பயன்பாட்டிற்கு வர உள்ளதாக மெட்ரோ நிர்வாகம் அறிவித்துள்ளது.சென்னை மெட்ரோ ரயில் நீட்டிப்புத் திட்டத்தின் கீழ் வண்ணாரப்பேட்டை முதல் விம்கோ நகர் வரை பயணிகள் சேவை இயக்கப்பட்டு வருகிறது. இந்த வழித்தடத்தில், திருவொற்றியூர் தேரடி மற்றும் விம்கோ நகர் பணிமனை ஆகிய மெட்ரோ ரயில் நிலையங்கள் இன்று முதல் பயன்பாட்டிற்கு வர உள்ளன. இந்த இரண்டு மெட்ரோ ரயில் நிலையங்களிலும் இன்று முதல் மெட்ரோ ரயில்கள் நின்று செல்லும் என அறிவிக்கப்ட்டுள்ளது. மேலும் விம்கோ நகர் பணிமனை மெட்ரோ ரயில் நிலையத்தில் இந்த மாதம் மட்டும் பயணிகள் தங்கள் வாகனங்களை இலவசமாக நிறுத்திக் கொள்ளலாம் என்று அறிவிக்கப்பட்டுள்ளதுஇதையும் படிக்க: கஜினி முகமது போல கொரோனா படையெடுத்தாலும் முறியடிப்போம் - ராதாகிருஷ்ணன்
http://dlvr.it/SLbYf8

Read More

"உயிர்கள் சாகிறது; காட்டுத்தீயில் இருந்து கொடைக்கானலை காப்பாத்தணும்" - கார்த்தி வேண்டுகோள்

கொடைக்கானலில் கடந்த சில நாட்களாக ஏற்பட்ட காட்டுத் தீ பெரிய அளவில் பாதிப்பை ஏற்படுத்தியுள்ளது. இதனையடுத்து, அனைவரும் விரும்பும் மலைகளில் இளவரவரசியை காக்க முன்வரவேண்டும் என நடிகர் கார்த்தி காணொளி வெளியிட்டுள்ளார். திண்டுக்கல் மாவட்டம் கொடைக்கானலில் கடந்த சில நாட்களாக பெருமாள்மலை வனப்பகுதியில் கடுமையான காட்டுத்தீ ஏற்பட்டது. இரண்டு நாட்களாக தொடர்ந்து எரிந்த தீயை வனத்துறை 90 சதவிகிதம் கட்டுப்படுத்தி வனத்தை பாதுகாக்கும் முயற்சியில் ஈடுபட்டு வருகின்றனர். இதையறிந்த நடிகர் கார்த்திக், காணொளி ஒன்றை வெளியிட்டுள்ளார். அதில், கொடைக்கானலில் ஏற்பட்ட காட்டுத்தீயால் தாவரங்கள், வன விலங்குகள் உள்ளிட்டவைகளுக்கு பாதிப்பு ஏற்பட்டுள்ளது. அனைவரும் விரும்பும் கொடைக்கானல் மலைப்பகுதியை காட்டுத்தீயில் இருந்து காக்க கவனமாக இருக்க வேண்டும் என்று கூறியுள்ளார். இந்த காணொளி சமூக வலைதலங்களில் வேகமாக பரவி வருகிறது.
http://dlvr.it/SLbKgH

Read More

ஓடிடி-ல் வெளியாகியிருக்கும் ஈஸ்ட்மென் காலத்துப் படம்! - ‘மாறன்’ திரைப்பார்வை

தனுஷ் - சத்யஜோதி ஃபிலிம்ஸ் கூட்டணியில் தொடரி, பட்டாஸ் படங்களைத் தொடர்ந்து மூன்றாவதாக வெளியாகியிருக்கும் திரைப்படம் மாறன். இந்த முறை ‘ஹோம் தியேட்டரில்’. டிஸ்னி ஹாட் ஸ்டாரில் நேற்று(11 மார்ச்) மாலை 5 மணிக்கு வெளியாகியிருக்கிறது. படத்தை இயக்கியிருப்பவர் துருவங்கள் 16, மாஃபியா படங்களின் இயக்குநரான கார்த்திக் நரேன். மாறனின் கதை டிரெயிலரிலே சொன்னதுதான். ஓர் அரசியல்வாதியின் ஊழலை வெளிக்கொணரும் நேர்மையான ஊடகவியலாளன் ஒருவனின் போராட்டமே படம். என்ன ஊழல், எந்த அரசியல்வாதி என்பதும் அதை மாறன் ஆகிய தனுஷ் எப்படி வெளிக்கொண்டுவந்தார், அதனால் என்ன சிக்கல்களை சந்தித்து எப்படி மீண்டார் என்பதே திரைக்கதை. இந்தப் படத்துக்கு ஸ்பாய்லர் எல்லாம் ஒன்றுமில்லை என்றாலும் இதற்கு மேல் கதை பற்றி சொல்ல தேவையில்லை. சில காட்சிகளை மட்டும் பார்க்கலாம். ஓப்பனிங் காட்சியில் பாரில் குடித்துக் கொண்டிருக்கிறார் தனுஷ். அவரிடம் பிரச்னை செய்ய வருகிறார்கள் அடியாட்கள். அவர் மண்டையில் பாட்டிலை உடைத்தாலும் மாறன் ரியாக்ட் செய்யாத அளவுக்கு போதை. ஒரு கட்டத்தில் சண்டை செய்கிறார். போலீஸ் வருகிறது. ஒரு ஃப்ளோவில் அவர்களில் ஒருவரையும் அடிக்கிறார் தனுஷ். போலீஸ் மேலயே கை வைக்கிறியா என ஸ்டேஷனுக்கு அள்ளிச் செல்கிறார்கள். அங்கு வரும் கதாநாயகி போலீஸைப் பார்த்து ‘I will sue you’ என்கிறார். போதையில் சண்டை செய்து, போலீஸையே அடித்த ஒருவனை ஸ்டேஷனுக்கு அழைத்து வந்ததற்கா இந்த கேஸ் என நீதிபதி கேட்டால் மாளவிகா என்ன சொல்வார் எனத் தெரியவில்லை. தனுஷ் ஒரு மீடியா அலுவலகத்துக்கு இண்டெர்வியூக்கு செல்கிறார். அங்கு உண்மையை மட்டுமே தனக்கு எழுத தெரியுமென்றும், பாஸிட்டிவ் செய்திகளை மட்டுமே எழுத விரும்புவதாகவும் சொல்கிறார். அப்போது 60 வயது சீனியர் ஒருவருடன் முட்டிக் கொள்கிறது. அந்த சீனியர் ட்விட்டரில் நடிகை ஒருவரின் கர்ப்பம் பற்றி ட்வீட் செய்வதாகவும் அதற்குத்தான் 10000 லைக்ஸ் வருமென்றும் சொல்கிறார். உடனே தனுஷ், மாணவர்கள் பற்றி ஒரு ட்வீட் செய்கிறார். எதற்கு முதலில் 10000 லைக்ஸ் என்பதுதான் போட்டி. இப்போது அந்த கான்ஃபரன்ஸ் ஹாலில் இருக்கும் திரையில் இரண்டு ட்வீட்களும் பெரிதாக தெரிய, லைக்ஸ் கவுண்ட் கிராபாக தெரிகிறது. சரி, ஆடியன்ஸ் நமக்காக இப்படிக் காட்டுவதாக நினைத்தால், ஒட்டுமொத்த அலுவலகமும் அந்தத் திரையில்தான் பார்க்கிறது. சினிமா நடிகை பற்றிய செய்தி உண்மைதான், அதுவும் நெகட்டிவ் ஆக ஒன்றுமில்லை. தனுஷ் கொள்கைபடி அதில் தவறேதுமில்லை. ஒருவேளை பொழுதுபோக்கு செய்திகளையே வெறுக்கிறார்போல என நினைத்தால், ட்விஸ்ட். போட்டியில் மாணவர் சக்தியால் தனுஷ் வெற்று பெற்றுவிடுகிறார். வெற்றி பெற்ற அந்த நொடியில் தனுஷ் ஆட ஆரம்பிக்கிறார். ‘ஏய் இது பொல்லாத உலகம்’. என்ன மாறன்… இதைத்தானே அந்த சீனியரும் சொன்னார்? அடுத்தக் காட்சி. முன்னாள் அமைச்சர் ஒருவரை விசாரிக்க இன்ஸ்பெக்டரான தன் நண்பனிடம் கோரிக்கை வைக்கிறார் தனுஷ். சரியான ஆதாரமில்லாமல் அப்படி செய்ய முடியாது என்கிறார் அந்த திறமையான… ஒரு நிமிடம்… அந்த போலீஸ். அடுத்த காட்சியில் தனுஷ் பார்க்காத ஒரு காரைப் பார்த்ததாக சொல்லி, அந்த வண்டியின் எண்ணைச் சொல்கிறார். அந்த வண்டி முன்னாள் அமைச்சர் பெயரில் பதிவாகியிருக்கிறது. இப்போது அந்த போலீஸுக்கு ஆதாரம் கிடைத்துவிட்டதாம். பெரிய அதிகாரியிடம் பேசி முன்னாள் அமைச்சரை விசாரிக்க அனுமதி வாங்குகிறார். அடுத்தக் காட்சியில் அவரும் தனுஷும் (ஆமா தனுஷ் எதற்கு?) முன்னாள் அமைச்சர் வீட்டுக்கு செல்ல, அங்கே அவர்கள் உள்ளே செல்ல அனுமதி மறுக்க ‘சர்ச் வாரண்ட்’ இருக்கு என்கிறார். விசாராணை செய்ய அனுமதி வாங்கினால் சர்ச் வாரண்ட்டா தருவார்கள்? அதுவும் தனுஷுடன் சென்று சர்ச் செய்ய… சரி. இன்னொரு காட்சியை… இப்படியே போனால் படம் முழுக்க சொல்ல வேண்டியிருக்கும். லோக்கல் விமானங்களில் விஸ்கி கொடுப்பது, ‘இப்படிலாம் நடக்கும்னு நான் கொஞ்சம் கூட நினைக்கல’ போன்ற டிரேட்மார்க் க்ளிஷே விஷயங்கள் படம் முழுக்க ஏராளம். படம் முழுக்க ஒரு முக்கிய எவிடென்ஸையே தேடுகிறார்கள் அல்லது ‘கொடுடா’ எனக் கேட்கிறார்கள்.அந்த எவிடென்ஸ் என்னவென்றுதான் தெரியவில்லை. மின்னணு வாக்குப் பதிவு ஊழல் எனச் சொல்லிவிடுகிறார்கள். பின், ஒரு பத்திரிகையாளரை வைத்து அதில் ஊழலே செய்ய முடியாது, உச்சநீதிமன்றம் முன்பாகவே நிரூபிக்கப்பட்டுவிட்டது என ஒரு பிரசாரமும் செய்கிறார்கள். இயக்குநரின் நோக்கம் என்ன என்பதுதான் புரியவில்லை. மாளவிகாவைத் தவிர அமீர், ஆடுகளம் நரேன் உட்பட பெரும்பாலானோரின் நடிப்பு கச்சிதம். 2000 ஆண்டு பத்திரிகையாளர் சத்தியமூர்த்தியாக நடித்திருக்கும் ராம்கியிலிருந்து தொடங்குகிறது திரைக்கதை. பிறகு, பத்திரிகையாளர் மாறனாக நடித்திருக்கும் தனுஷ் வளர்ந்து 2021 ஆம் ஆண்டிலிருந்து தொடங்குவதாக காண்பிக்கப்படுகிறது. ஆனால், திரைக்கதையோ 2000 ஆண்டிலிருந்து 21 வருடங்கள் கழித்து இல்லாமல் 21 வருடத்துக்கு முன்பு உள்ளதுபோல் பழமையான காட்சிகளாக உள்ளன. ராம்கி முதல் காட்சியில் வெளியிடும் செய்தியில் பள்ளியின் நிர்வாகி, என்னமாதிரியான அலட்சியத்தால் குழந்தைகள் மரணத்துக்கு காரணமானவர் என்பது தெரியவில்லை. அதேபோல், ஸ்டிங் ஆபரேஷன் ரேஞ்சுக்கு ஃபைவ்ஸ்டார் ஹோட்டல் அறையில் ஆடியோவை எல்லாம் ஒட்டு கேட்டு டேப் செய்யும் தனுஷ் அதை எப்படி செய்தியாக வெளியிட்டார் என்பதும் மர்மமாக உள்ளது. அதுவும், டிவிட்டரில் செய்தி வெளியிடுகிறார். ஆதாரங்களையும் அதிலேயே வெளியிட்டிருக்கலாமே என்று கேட்க தோன்றுகிறது. போஸ்ட்மார்ட்டம் ரிப்போர்ட் வந்ததுமே தங்கையின் மரணம் குறித்து ஈஸியாக கண்டுபிடித்திருக்கலாம். ஆனால், சஸ்பென்ஸ் வைக்கவேண்டும் என்ற கட்டாயத்திற்காகவே தனுஷ் குடித்து குடித்து கோமாவிலேயே கிடக்கிறார். 'ரைட்டர்' படத்தில் சமுத்திரக்கனியின் தொப்பை கூட நடித்திருக்கும். ஆனால், இப்படத்தில் 'தொப்பை' விழும் அளவுக்கு உழைக்காமல் இருந்திருக்கிறார் என்பது சமுத்திரக்கனியின் சுமாரான நடிப்பின் மூலம் தெரிய வருகிறது. படத்தின் பெரும்பாலான காட்சிகள் இருளிலேயே எடுக்கப்பட்டதால் படத்தில் வருவதுபோல நம் கண்களிலும் அமிலப்பவுடரை தூவியதுபோல் உள்ளது. படத்தில் எடிட்டிங் ஓரளவுக்கு திரைக்கதையின் தொய்வைக் கட்டுப்படுத்துகிறது. பொல்லாத உலகம் பாடலில் மட்டும் ஜி.வி.பி. ஜொலிக்கிறார். சண்டைக் காட்சிகள் நன்றாக இருந்தாலும் அதற்கான காரணங்கள் சப்பென போவதால ஈர்க்கவில்லை. க்ளைமாக்ஸில் ‘ஹோட்டல் பில்’ குத்தியிருக்கும் கம்பி போல ஒரு ஈட்டியைக் காலில் குத்திய பின்னும் அமீர் செய்யும் ரணகளங்கள் காமெடிக்கான ரீப்ளேஸ்மெண்ட். வெற்றி மாறனுடன் தனுஷ் சேர்ந்தால்தான் மேஜிக் நிகழ்கிறது என சமூக வலைதளத்தில் அடிக்கடி சொல்லப்படுவதுண்டு. இந்தப் படத்தில் அவர் பெயரில் பாதி இருக்கிறது. ஆனால், வெற்றி இல்லை. தனுஷ் இப்போது ஹாலிவுட்டில் நடிப்பவர். இந்தியா முழுக்க முகம் தெரிந்தவர். அவரது ஒவ்வொரு புராஜெக்டையும் கவனமாகச் செய்ய வேண்டிய அவசியமும் பொறுப்பும் அவருக்கிருக்கிறது. மாறன் போன்ற வழக்கமான, சுமாரான கதையை அவர் எப்படித் தேர்ந்தெடுத்தார் என்பது தான் தெரியவில்லை. விரைவில், ஃபார்முக்கு வந்து ரசிகர்களைக் குஷிப்படுத்துங்கள் தனுஷ். ஏனெனில், நீங்கள் ஒரு நிகரற்ற கலைஞன்.
http://dlvr.it/SLZX8f

Read More

அன்று 4 முறை முதல்வர்; இன்று ஒரு தொகுதியில் மட்டுமே வெற்றி! - ஏன் மாயமானார் மாயாவதி?

“எனக்குப் பின்னும் எனது லட்சியம் தொடரும் என்கிற நம்பிக்கை இருக்கிறது. ஒடுக்கப்பட்ட மக்களுக்கான என் லட்சியப் பணிகளை எனக்குப் பின்னால் தொடரும் பணியை மாயாவதியிடம் ஒப்படைக்கிறேன்" - 2001-ம் ஆண்டு அரசியலிருந்து ஓய்வு பெறும் முடிவை எடுத்தபோது கன்ஷி ராம் சொன்ன வார்த்தைகள். அதே கன்ஷி ராம் இன்றிருந்தால் “என்னோடு என் லட்சியமும் புதைந்துவிடும் என்று உறுதியாக நம்புகிறேன்” என்று சொல்லியிருப்பார். மாயாவதியின் மௌன அரசியலே அதற்குக் காரணமாக இப்போது இருந்திருக்கும். கணிக்க முடியாத அரசியல்வாதி என்று ஒருகாலத்தில் வர்ணிக்கப்பட்டவர் இன்று அரசியல் களத்தில் காணமல் போன கதையே இது!கன்ஷி ராம் - மாயாவதி 2008-ம் ஆண்டு உலகின் சக்தி வாய்ந்த 100 பெண் தலைவர்கள் பட்டியலை போர்ப்ஸ் பத்திரிக்கை வெளியிட்டது. அந்த பத்திரிக்கையில் இந்தியாவில் சக்திமிக்க அரசியல் தலைவராக சுட்டிக்காட்டபட்டவர் மாயாவதி. அதிரடி பேச்சுகளால் அகில இந்திய அரசியலையும் தன்னை நோக்கித் திரும்பி பார்க்க வைத்தவர், இன்று இருக்கும் இடம்தெரியாமல் அமைதியாக இருப்பதன் அர்த்தம் அந்த கட்சியினருக்கே புரியவில்லை. உத்திரபிரதேசத்தில் ஒடுக்கப்பட்ட சமூகத்தில் பிறந்து டெல்லியில் கல்லுாரி படிப்பை முடித்தவர் மாயவதி நைனா குமாரி. பி.எட் படிப்பு முடித்துவிட்டு, டெல்லியில் ஒரு தனியார் பள்ளியில் ஆசியராக பணியாற்றிக்கொண்டே, ஐ.ஏ.எஸ் தேர்வுக்கான பயிற்சியிலும் தீவிரம்காட்டி வந்தார் மாயாவதி. அப்போது வட மாநிலங்களில் நிலவிய கடும் சமூக தீண்டாமைக்கு எதிராக பல்வேறு அமைப்புகள் களமாடி வந்தது. அப்படி ஒரு அமைப்பாக செயல்பட்டு வந்தது டிஸ்-4 என்கிற அமைப்பு. இந்த அமைப்பை நடத்திவந்தவர் தான் பின்னாளில் பகுஜன் சமாஜ் கட்சியின் நிறுவனராக இருந்த கன்ஷி ராம். ஒருகட்டத்தில் கன்ஷி ராம் பகுஜன் சமாஜ் கட்சியை ஆரம்பித்த போது தனது கட்சிக்கு வலிமையான ஒரு பெண் ஆளுமை தேவை என்பதை அறிந்து மாயாவதியை வீடு தேடி சென்று அழைத்து கட்சியில் இணைத்துக்கொண்டார். காரணம், அன்றைக்கு ஓடுக்கப்பட்டவர்களுக்கு எதிரான பிரசார முழக்கங்களில் மாயாவதியின் குரல் வலுவாக இருந்தது. கன்ஷி ராம் கட்சியின் தலைவராக இருந்தாலும், அந்த கட்சியின் முகமாக பட்டிதொட்டி எங்கும் அறியப்பட்டவர் மாயாவதிதான். அந்த பலமே அவரை உத்திரபிரேசத்தின் அசைக்கமுடியாத சக்தியாக மாறவும் வழிவகுத்தது. 1989-ம் ஆண்டு முதல்முறை சட்டமன்றத்திற்குள் நுழைந்த மாயாவதி, அடுத்த ஆறு ஆண்டுகளில் இந்தியாவின் மிகப்பெரிய மாநிலமான உத்திரபிரதேசத்தின் முதல்வர் அரியாசனத்திலும் அமர்ந்தார். அப்போது அவருக்கு வயது 39. அதன்பிறகு உத்திரபிரதேச அரசியலில் மட்டுமல்ல, அகில இந்திய அரசியலிலும் விறுவிறு வளர்ச்சி கண்டார். ஒருகட்டத்தில் இந்தியாவின் பிரதமர் பதவிக்கு குறிவைத்தார் மாயாவதி. அந்தநேரத்தில் இந்திய அரசியல் களமே பெண்களின் பிடிக்குள் வந்திருந்தது.காங்கிரஸ் கட்சியின் தலைவராக சோனியா காந்தி, தென்மாநிலத்தில் வலுவான ஒரு தலைவராக ஜெயலலிதா, மேற்கு வங்கத்தில் மம்தா, வடமாநிலங்களில் வியாபித்திருந்த பகுஜன் சமாஜ் கட்சியின் தலைவராக மாயாவதி என்று பெண்கள் கரங்களில் இந்திய அரசியல் களம் இருந்தது.பகுஜன் சமாஜ் அலுவலகம் அதேநேரம் 2007-ம் ஆண்டு மாயாவதி நான்காவது முறையாக உத்திரப் பிரதேச முதல்வராகப் பதவியேற்றபோது, தற்சார்பு கொள்கையாக அவரது ஆட்சி அமைந்தது. ஆடம்பரத்தின் உச்சத்திற்குச் சென்றார். பகுஜான் சமாஜ் கட்சி அலுவலகமே அரண்மனை போன்று கட்டப்பட்டது. யானை சிலைகள் உத்திரபிரதேசம் முழுவதும் முளைத்தது. கன்ஷி ராமுக்கு சிலைகள் வைத்ததைக்கூட ஏற்றுக்கொள்ளலாம், முதல்வராக இருந்த மாயாவதிக்கும் சிலை நிறுவியதை ஒடுக்கப்பட்ட மக்களே ரசிக்கவில்லை. அதுவரை மாயாவதி என்கிற தலைவர்மீது மக்கள் வைத்திருந்த நம்பிக்கையும் உடைந்து போனது. இதன்விளைவு அடுத்து நடந்த சட்டமன்ற தேர்தலில் வெளிப்பட்டது. 2012-ம்ஆண்டு நடந்த உபி சட்டமன்ற தேர்தலில் ஆட்சியிலிருந்த பகுஜன் சமாஜ் கட்சி படுதோல்வியைச் சந்தித்தது. 80 இடங்களை மட்டுமே பெற்றது பகுஜன் சமாஜ் கட்சி. அதன்பிறகு அந்த கட்சியின் அஸ்தமனமும் ஆரம்பித்தது. மாயாவதியின் ஐந்தாண்டு ஆட்சியில் நடந்த முறைகேடுகளை வைத்து அவர் மீது வழக்கு பதியப்பட்டது. ஒடுக்கபட்ட மற்றும் சிறுபான்மையினருக்கான கட்சியாக அறியப்பட்ட பகுஜன் சமாஜ் கட்சி அதன்பிறகு கொஞ்சம் கொஞ்சமாக பாதை மாறியது. குறிப்பாக 2014-ம் ஆண்டு மோடி தலைமையில் பாஜக ஆட்சியை பிடித்தவுடன் மாயாவதியின் குரலும் ஒடுங்கியது. பொதுவெளியில் மதவாத சக்தி என்று மாயாவதியால் அதற்கு முன்பாக விமர்சிக்கப்பட்ட பாஜக-வின் நடவடிக்கைகளை பலநேரங்களில் ஆதரிக்க ஆரம்பித்தார்.இதன்விளைவு 2017-ம் ஆண்டு சட்டமன்ற தேர்தலில் மேலும் படுதோல்வியை பகுஜன் சமாஜ் கட்சி சந்தித்து 19 இடங்களில் மட்டுமே வெற்றி கண்டது. இப்படி தொடர் சரிவிலிருந்த நிலையில் கட்சியை மீண்டும் எழுச்சி பெற செய்வார் மாயாவதி என்று கட்சியினர் எதிர்பார்த்த நிலையில் வெளியே தலைகாட்டுவதையே தவிர்க்க ஆரம்பித்தார். யோகியின் ஆட்சியில் நடந்த பல்வேறு தவறான நடவடிக்கைகளுக்கு மௌனத்தை மாயாவதி பதிலாகத் தந்தார். ஒடுக்கப்பட்ட மக்களின் ஆதரவுடன் ஒரு மாநிலத்தின் முதல்வராகமுடியும் என்று நிரூபித்த மாயாவதி அதே ஒடுக்கபட்ட இனத்தை சேர்ந்த பெண் ஒருவர் படுகொலை செய்யப்பட்டபோது அதை கண்டிக்கக்கூட மனமின்றி அமைதிகாத்தது, யாருக்கு பயந்து இவர் மாயமாகிவருகிறார் என்கிற சந்தேகத்தை எழுப்பியது. பாஜக-வை பலமுடன எதிர்க்க வேண்டியவர் மௌனமாக அதை ஆதரிக்கவும் செய்தார். அவர் மீதிருக்கும் வழக்குகள்தான் அதற்குக் காரணம் என்று விமர்சனங்களும் எழுந்தது. ஒடுக்கப்பட்ட மக்களுக்கான அவரது குரல் முன்னேறிய சமூகத்தினருக்கான குரலாகவும் சில நேரங்களில் ஒலிக்க ஆரம்பித்து. குறிப்பாக மத்திய அரசு கொண்டுவந்த முத்தலாக் சட்டம், காஷ்மீர் அங்கீகாரம் ரத்து, குடியுரிமை சட்டத்திற்கு மறைமுக ஆதரவு என்று மாயாவதியின் அரசியல் பாதை மாற ஆரம்பித்து். அதுவே அவரது அரசியலின் அஸ்தமனத்திற்கும் வலுவான காரணமாகிவிட்டது. பாஜக வலுவாக அரசியல் செய்யும் நேரத்தில் அதை எதிர்த்து வலுவான ஒருஅணியை கட்டமைக்கவும் மாயாவதி தயாராக இல்லை. ஏன்? நடந்து முடிந்த உத்திரபிரதேச சட்டமன்ற தேர்தலில் அவர் போட்டியிடவே இல்லை.உ.பி தேர்தல் முடிவுகள் மாயவதியின் இந்த அரசியல் அமைதியால் அங்கு பீம் ஆர்மி என்கிற கட்சியைத் தொடங்கிய சந்திசேகர ஆசாத் பக்கம் ஒடுக்கபட்ட மக்களின் பார்வை பட ஆரம்பித்துள்ளது. அதுவும் மாயாவதிக்கு எரிச்சலை ஏற்படுத்தியிருக்கிறது.ஆனால் தன்னுடைய அரசியல் நிலைப்பாடுதான் இந்த மாற்றத்திற்கு காரணம் என்பதை அவரது அதிகார மனோபாவம் ஏற்றுக்கொள்ள மறுக்கிறது. இதன்விளைவு மிகப்பெரிய மாநிலத்தை ஆண்ட கட்சியாகவும், தேசிய கட்சியாகவும் பரிணாமம் பெற்றிருந்த பகுஜன் சமாஜ் கட்சி நடந்து முடிந்த சட்டமன்ற தேர்தலில் ஒரு இடத்தில் மட்டுமே வெற்றி பெற்றுள்ளது. இனி பகுஜன் சமாஜ் கட்சி கரைசேருவது கடினம் என்று உணர்ந்த அந்த கட்சியின் இரண்டாம் கட்ட தலைவர்கள் மாற்றுக்கட்சிக்கு படையெடுக்க ஆரம்பித்துவிட்டார்கள்.மாயாவதியின் அரசியல் அமைதிக்கு அவரது உடல்நிலையும் ஒருகாரணம் என்கிறார்கள்.அதற்காக ஒருகட்சியை காவு கொடுக்கும் மனோபாவத்திற்கு மாயாவதி சென்றுவிட்டாரா என்கிற கேள்வியும் எழுகிறது. இரண்டாம் கட்டத் தலைவர்களை வைத்து கட்சியை வளர்க்கும் வேலையைக்கூட செய்யவில்லை. ட்விட்டரில் விமர்சனம் செய்யும் அரசியலை மட்டுமே செய்துவருகிறார். அவருக்கு பக்கபலமாக இருந்த ஒடுக்கப்பட்ட மக்களின் நிலை அத்தனை சுகமாக இல்லை என்பது அவருக்கு புரியாதது அல்ல. அரசியலில் தான் அடைந்த உச்சம்போதும் என்கிற முடிவை மாயாவதி என்கிற தனி மனிதர் எடுக்கலாம்.ஆனால் பகுஜன் என்கிற பெரும்பான்மை மக்களுக்கான ஒரு இயக்கத்திற்கு முடிவுரை எழுத நினைப்பதுதான் மாயாவதி செய்யும் மாபெரும் தவறு. கன்ஷிராமின் கனவும் இப்போது கரைய ஆரம்பித்துவிட்டது. உங்கள் லட்சியத்தை நான் நிறைவேற்றுவேன் என்று சொன்ன மாயாவதியின் மௌனமே அதற்கு காரணமாகிவிட்டது!
http://dlvr.it/SLYpnb

Read More

உத்தராகண்ட் மாநிலத்தின் அடுத்த முதலமைச்சர் யார்?

உத்தராகண்ட் மாநிலத்தில் பாஜக தனிப் பெரும்பான்மையுடன் வென்றுள்ள நிலையில் முதலமைச்சர் தேர்வில் அக்கட்சி தற்போது தீவிரம்காட்டி வருகிறது. 70 இடங்களைக் கொண்ட அம்மாநில சட்டப்பேரவையில் 47 தொகுதிகளில் பாஜக வெற்றிபெற்று ஆட்சியைத் தக்கவைத்துள்ளது. ஆனால் காட்டிமா தொகுதியில் போட்டியிட்ட முதலமைச்சர் புஷ்கர் சிங் தாமி தோல்வியடைந்தார். இந்நிலையில் தாமிக்கே மீண்டும் வாய்ப்பு தரலாமா அல்லது வேறு மூத்த தலைவர்களில் ஒருவரை முதல்வர் நாற்காலியில் அமரவைக்கலாமா என பாஜக ஆலோசித்து வருகிறது. இதுகுறித்து இறுதி முடிவு எடுப்பதற்காக மத்திய அமைச்சர்கள் பியூஷ் கோயல், தர்மேந்திர பிரதான் ஆகியோர் உத்தராகண்ட் செல்வார்கள் எனத் தெரிகிறது. உத்தராகண்ட்டில் அபார வெற்றிபெற்றும் முதலமைச்சர் தேர்வு செய்யப்படாமல் இருப்பதால் ஆட்சியமைப்பதும் தாமதமாகி வருகிறது. அம்மாநிலத்தில் கடந்த பாஜக ஆட்சிக்காலத்தில் 3 முதலமைச்சர்கள் மாற்றப்பட்டிருந்தது குறிப்பிடத்தக்கது.
http://dlvr.it/SLYRs1

Read More

மக்கள் எங்களுக்கு வாக்களித்தது ஏன்? - பிரதமர் மோடி பேச்சு

வளர்ச்சியை விரும்பியே மக்கள் தேர்தலில் வாக்களித்துள்ளதாக பிரதமர் மோடி பேசியுள்ளார்5 மாநில தேர்தல் முடிவுகள் வெளியாகியுள்ள நிலையில் குஜராத்தில் இந்தாண்டு இறுதியில் பேரவை தேர்தல் நடைபெற உள்ளது. இச்சூழலில் பிரதமர் மோடி அங்கு 2 சுற்றுப்பயணம் சென்றுள்ளார். தேர்தல் வெற்றியை ஒட்டி நடைபெற்ற 10 கிலோ மீட்டர் நீளத்திற்கு நடந்த வெற்றிப்பேரணியை பிரதமர் பார்வையிட்டார். இதன்பின் அகமதாபாத்தில் சுமார் ஒரு லட்சம் உள்ளாட்சி பிரதிநிதிகள் பங்கேற்ற கூட்டத்தில் பேசிய பிரதமர், ஜனநாயக நாட்டில் வளர்ச்சிப்பணிகளே தங்கள் பிரதிநிதிகளின் பிரதான செயல்பாடாக இருக்க வேண்டும் என்பதை மக்கள் உணர்ந்திருப்பதாக தெரிவித்தார். இந்தியா 75ஆவது சுதந்திர ஆண்டை கொண்டாடும் இத்தருணத்தில் மகாத்மா காந்தி கண்ட கிராமப்புற வளர்ச்சி என்ற கனவை நிறைவேற்ற தங்கள் அரசு பாடுபடுவதாக தெரிவித்தார். பிரதமர் தனது பயணத்தின் போது சோம்நாத் கோயில் அறங்காவலர் குழு கூட்டத்திலும் பங்கேற்றார். இக்கூட்டத்தில் சோம்நாத் கோயிலுக்கு தங்க தகடு பொருத்த முடிவெடுக்கப்பட்டது. புகழ் பெற்ற சோம்நாத் கோயிலின் அறங்காவலர் குழு தலைவராக பிரதமர் மோடி உள்ளது குறிப்பிடத்தக்கது. பிரதமர் தனது முதல் நாள் பயணத்தின் நிறைவாக காந்தி நகரின் புறநகர் பகுதியில் தனது தம்பி பங்கஜ் மோடியின் வீட்டிற்கு சென்றார். அங்கு வசித்து வரும் தாய் ஹீராபாயிடம் நலம் விசாரித்த பிரதமர், அவரிடம் ஆசியும் பெற்றார். பின்னர் தாயுடன் பிரதமர் உணவுண்டார்.
http://dlvr.it/SLXsLN

Read More

Paytm-க்கு திடீரென கட்டுப்பாடுகளை விதித்த ரிசர்வ் வங்கி: என்ன காரணம்?

பணப் பரிவர்த்தனை விதிமுறைகளை முறையாக பின்பற்றாத காரணத்தால் பேடிஎம் பேமண்ட் வங்கி (Paytm Payment Bank) புதிய வாடிக்கையாளர்களை சேர்க்க ரிசர்வ் வங்கி தடை விதித்து உத்தரவிட்டுள்ளது. இந்தியாவில் டிஜிட்டல் பணப்பரிவர்த்தனை முறை நாளுக்கு நாள் கணிசமாக அதிகரித்து வருகிறது. பொருட்களை வாங்குவதற்கு மட்டுமல்லாமல் இன்னபிற சேவைகளுக்காக பணத்தை வழங்குவதற்கும் கூகுள் பே, பேடிஎம், ஃபோன் பே உள்ளிட்ட டிஜிட்டல் பணப்பரிவர்த்தனை ஆப்கள் பயன்படுத்தப்பட்டு வருகின்றன. இந்த ஆப்-களை பதிவிறக்கம் செய்வதும், அவற்றில் நமது வங்கிக் கணக்கு விவரங்களை இணைப்பதும் மிகவும் எளிமையாக இருப்பதால் இந்தியாவில் கோடிக்கணக்கானோர் இதுபோன்ற டிஜிட்டல் பணப்பரிவர்த்தனை ஆப்களை பயன்படுத்தி வருகிறார்கள். இந்த ஆப்களை நிர்வகிக்க தனித்தனியாக வங்கிகள் செயல்படுகின்றன. அவையாவும் ரிசர்வ் வங்கி வகுத்துக் கொடுத்த விதிமுறைகளின் கீழ் இயங்கி வருகின்றன. இதனிடையே, பேடிஎம் ஆப்-ஐ நிர்வகிக்கும் பேடிஎம் பேமண்ட் வங்கியானது, பணப்பரிவர்த்தனை விதிமுறைகளை முறையாக பின்பற்றவில்லை எனக் கூறப்படுகிறது. இந்த விவகாரம் குறித்து ரிசர்வ் வங்கி விசாரணை நடத்தி வந்த நிலையில், இதுதொடர்பான உத்தரவை இன்று பிறப்பித்துள்ளது. அதில், "பேடிஎம் பேமண்ட் வங்கி இனி புதிய வாடிக்கையாளர்களை சேர்க்க தடை விதிக்கப்படுகிறது. ரிசர்வ் வங்கியின் அனுமதிக்கு பிறகே, புதிய வாடிக்கையாளர்கள் சேர்க்கப்பட வேண்டும். அதேபோல், பேடிஎம் வங்கியின் தகவல் தொழில்நுட்ப அமைப்பை தணிக்கை செய்ய ஒரு ஐ.டி. தணிக்கை நிறுவனத்தை நியமிக்க வேண்டும்" எனக் கூறப்பட்டுள்ளது.
http://dlvr.it/SLWMxh

Read More

தடைகளை தகர்த்தெறிந்து சாதனை - ஆம் ஆத்மி பஞ்சாபை வசப்படுத்திய கதை!

உத்தரபிரதேசம் உள்ளிட்ட ஐந்து மாநில சட்டப்பேரவைத் தேர்தல் முடிவுகள் வெளியாகிவிட்டன. வழக்கமாக இதுபோன்ற சமயங்களில், அரசியல் முக்கியத்துவம் வாய்ந்த மாநிலமான உத்தரப்பிரதேசத்தின் தேர்தல் முடிவுகள் பற்றிதான் நாடே பரபரப்பாக பேசிக் கொண்டிருக்கும். ஆனால், இந்த முறை தேர்தல் கதாநாயகனாக மாறியிருப்பது பஞ்சாப் மாநிலம் தான். உத்தரபிரதேசத்தில் பெரும்பாலானோர் கணித்தது போலவே ஆட்சியை தக்க வைத்திருக்கிறது பாஜக. எதிர்பார்த்தது நடந்துவிட்டால் என்ன சுவாரசியம் இருந்துவிடப் போகிறது என்பதாலோ என்னவோ, உத்தரபிரதேச தேர்தலையும் தாண்டி நாடு முழுவதும் பெரும் பேசுப்பொருளாகவும், விவாதப்பொருளாகவும் மாறியிருக்கிறது பஞ்சாப் தேர்தல் முடிவு. அதற்கு காரணமும் இருக்கிறது. பஞ்சாபில் சுமார் 70 ஆண்டுக்காலம் மாறி மாறி ஆட்சி அமைத்து வந்த காங்கிரஸையும், சிரோன்மணி அகாலி தளத்தையும் துடைத்தெறிந்து விட்டு கம்பீரமாக அரியணை ஏறி அமர்ந்திருக்கிறது ஆம் ஆத்மி. மொத்தமுள்ள 117 தொகுதிகளில் 92 தொகுதிகளில் வெற்றி பெற்று தனிப்பெருங்கட்சியாக ஆம் ஆத்மி உருவாகி இருக்கிறது. 10 ஆண்டுகளுக்கு முன்பு தொடங்கப்பட்ட ஒரு கட்சி, நாட்டின் தலைநகரில் ஆட்சியை பிடித்ததுடன் மட்டுமல்லாமல், அதன் அண்டை மாநிலத்திலும் ஆட்சியைக் கைப்பற்றியிருப்பது இந்தியாவை பொறுத்தவரை ஒரு சரித்திர சாதனை என்றே சொல்ல வேண்டும். அந்த சாதனையை சத்தமே இல்லாமல் செய்து முடித்திருக்கிறது ஆம் ஆத்மி. ஆனால், இந்த வெற்றி ஒன்றும் அக்கட்சிக்கு எளிதில் கிடைத்துவிடவில்லை. அதற்கு பின்னால் மிகப்பெரிய உழைப்பும், நேர்த்தியான திட்டமிடலும் இருந்திருக்கிறது என்பது தான் நிதர்சனமான உண்மை. ஊழலுக்கு எதிரான போராட்டக்களத்தில் உதயமான ஆம் ஆத்மி இயக்கம், ஒரு முழுமையான அரசியல் கட்சியாக மாறியது 2012-ம் ஆண்டில்தான். அதன் பிறகு ஒரே ஆண்டிலேயே தலைநகர் டெல்லியை கைப்பற்றி ஒட்டுமொத்த இந்தியாவையும் ஆச்சரியத்தில் ஆழ்த்தியது. ஆனால் வந்த வேகத்திலேயே ஆட்சியில் இருந்து ஆம் ஆத்மி அகன்றது. டெல்லியில் அரசு ஊழியர்கள் மீதான ஊழல் வழக்குகளை விசாரிக்க 'ஜன் லோக்பால்' அமைப்பை உருவாக்கும் தனது முயற்சி தோல்வி அடைந்ததால், அதிரடியாக முதல்வர் பதவியை ராஜினாமா செய்தார் அக்கட்சியின் தேசிய ஒருங்கிணைப்பாளர் அர்விந்த் கேஜ்ரிவால். 'அரசியல் அனுபவமில்லாத ஒரு முன்னாள் அரசு அதிகாரியிடம் ஆட்சியை கொடுத்தால் இப்படிதான் நடக்கும்' என அந்த சமயத்தில் நாடே முணுமுணுத்தது. தான் செய்தது மாபெரும் தவறு என்பதை கேஜ்ரிவாலும் ஒருசில நாட்களில் உணர்ந்தார். அதன் பிறகு, 2014-ம் ஆண்டு மக்களவைத் தேர்தலில் டெல்லியிலும், அண்டை மாநிலமான பஞ்சாபிலும் களம் இறங்கியது ஆம் ஆத்மி. ஆனால், இந்த முறை ஆம் ஆத்மியை டெல்லி முழுமையாக புறக்கணித்தது. அங்குள்ள 7 மக்களவைத் தொகுதிகளில் ஒன்றை கூட அக்கட்சியால் கைப்பற்ற முடியவில்லை. அனைத்து தொகுதிகளிலும் பாஜக வெற்றி பெற்றது. அந்த சமயத்தில்தான் ஆம் ஆத்மிக்கும், பஞ்சாப் மாநிலத்துக்குமான அறிமுகம் ஆரம்பமாகிறது. அந்த தேர்தலில் டெல்லி மக்களால் புறக்கணிக்கப்பட்ட ஆம் ஆத்மிக்கு 4 மக்களவைத் தொகுதிகளை பரிசாக வழங்கினர் பஞ்சாப் மக்கள். உண்மையிலேயே இந்த வெற்றியை ஆம் ஆத்மியும், அர்விந்த் கேஜ்ரிவாலுமே கூட எதிர்பார்க்கவில்லை. அப்போதுதான் பஞ்சாப் மாநிலம், மாற்று அரசியலுக்காக பல ஆண்டுகளாக ஏங்கிக் கொண்டிருக்கிறது என்கிற உண்மை கேஜ்ரிவாலுக்கு தெரியவந்தது. சிறிதும் தாமதிக்காமல், டெல்லியை போல பஞ்சாபிலும் அடிமட்டத்தில் இருந்து ஆம் ஆத்மியை வலுப்படுத்தும் முயற்சியில் தீவிரமாக இறங்கினார் கேஜ்ரிவால். உண்மையை சொல்லப்போனால், அன்றைக்கு பஞ்சாப் அளித்த உத்வேகம்தான் அர்விந்த் கேஜ்ரிவாலை மீண்டும் தீவிர அரசியலில் இறங்கச் செய்தது. டெல்லியில் ஆட்சியை ராஜினாமா செய்ததற்காக மக்களிடம் பகிரங்க மன்னிப்பு கோரினார் கேஜ்ரிவால். இனி ஒரே ஒரு முறை மட்டும் வாய்ப்பு தாருங்கள் என டெல்லியில் வீடு வீடாக சென்று ஆம் ஆத்மி பிரச்சாரம் செய்தது. கேஜ்ரிவாலின் அந்த அணுகுமுறை நல்ல பலனையும் கொடுத்தது. 2015-ம் ஆண்டு டெல்லி சட்டப்பேரவைத் தேர்தலில் மீண்டும் மிகப்பெரிய வெற்றியை பதிவு செய்தது ஆம் ஆத்மி. ஆட்சிப்பீடத்தில் அமர்ந்த கேஜ்ரிவால், மத்திய அரசு தந்த இடையூறுகளையும் மீறி டெல்லியில் அற்புதமான ஆட்சியை வழங்கினார். டெல்லி மக்கள் இதுவரை கண்டிராத ஊழலற்ற ஆட்சியாக அது இருந்தது மட்டுமல்லாமல், அரசு இயந்திரத்தில் இருந்த ஊழல்வாதிகளும் தயவு தாட்சண்யமின்றி களையெடுக்கப்பட்டனர். டெல்லியில் அப்போது ஆம் ஆத்மி அரசு செயல்பட்ட விதம் பஞ்சாப் மக்களை பெரிதும் கவர்ந்தது. காலங்காலமாக ஊழல் ஆட்சியையும், அலட்சியமான நிர்வாகத்தையும் கண்டு வெதும்பிய பஞ்சாப் மக்களுக்கு, ஆம் ஆத்மி ஒரு புதிய நம்பிக்கையை தந்தது என்றால் அது மிகையல்ல. ஆம் ஆத்மியும் இதனை புரிந்துகொண்டு, 2017-ம் ஆண்டு சட்டப்பேரவைத் தேர்தலுக்காக பஞ்சாபில் தீவிர களப்பணி ஆற்றியது. அதே சமயத்தில், ஆளும் சிரோன்மணி அகாலி தளமும், எதிர்க்கட்சியாக இருந்த காங்கிரஸும் ஆம் ஆத்மியை மக்கள் முன்பு எதிர்மறையாக பிம்பப்படுத்தின. கேஜ்ரிவாலை 'காலிஸ்தான் ஆதரவாளர்' என அவர்கள் குற்றம்சாட்டினர். மேலும், வேறு மாநிலத்தைச் சேர்ந்த கட்சி பஞ்சாபில் ஆட்சியமைக்க வருவதா என்று கூறி மக்களின் இனவாத உணர்வையும் அவை தூண்டிவிட்டன. இத்தனை அவதூறுகளையும் தாண்டி, தேர்தலை சந்தித்தது ஆம் ஆத்மி. யாரும் எதிர்பாராவிதமாக முதல் தேர்தலிலேயே பஞ்சாபில் 20 தொகுதிகளை அக்கட்சி கைப்பற்றியது. அதுமட்டுமல்லாமல், சிரோன்மணி அகாலி தளத்தை பின்னுக்கு தள்ளி, 'பிரதான எதிர்க்கட்சி' என்ற அந்தஸ்தையும் ஆம் ஆத்மி பிடித்தது. ஒருவேளை, முதல்வர் வேட்பாளரை முன்னிறுத்தி இருந்தால் அந்த தேர்தலிலேயே ஆம் ஆத்மி வெற்றி பெற்றிருக்கும் என்பது அரசியல் நிபுணர்களின் கருத்தாக இருந்தது. அடுத்தடுத்த சறுக்கல்கள் எல்லாம் சரியாக போய்க் கொண்டிருந்த வேளையில், அடுத்து வரும் மூன்று ஆண்டுகள் (2017- 2020), ஆம் ஆத்மிக்கு பெரும் சறுக்கல்களையும், தடைகளையும் தரப்போகிறது என நிச்சயம் யாரும் எண்ணிப் பார்த்திருக்க மாட்டார்கள். ஆம் ஆத்மியின் இந்த அசுர வளர்ச்சி, தேசியக் கட்சிகளான பாஜகவுக்கும், காங்கிரஸுக்கும் கிலியை ஏற்படுத்துவதாக இருந்தது. ஆம் ஆத்மிக்கு மக்கள் மத்தியில் இருக்கும் ஒரே பலம், அது ஊழலை ஒருபோதும் சகித்துக் கொள்ளாத கட்சி என்பதுதான். இதனை புரிந்துகொண்ட எதிர்க்கட்சிகள், முதலில் அந்தப் பெயருக்கு களங்கம் ஏற்படுத்துவதற்கு சதித்திட்டங்களை தீட்டின. விளைவு, ஆம் ஆத்மி அரசு மீது பல ஊழல் குற்றச்சாட்டுகள் அடுக்கடுக்காக சுமத்தப்பட்டன. 'ஆம் ஆத்மி ஒன்றும் வானத்தில் இருந்து குதித்த அரசியல் கட்சி அல்ல; வாய்ப்பு கிடைத்தால் அதுவும் ஊழல் செய்யும்' என சித்தரிப்பதுதான் எதிர்க்கட்சிகளின் பிரதான முயற்சியாக இருந்தது. அதற்கு கை மேல் பலனும் கிடைத்தது. ஆம் ஆத்மியை டெல்லி மக்கள் சந்தேகிக்க தொடங்கினர். இதன் காரணமாக பஞ்சாபிலும் ஆம் ஆத்மிக்கு எதிரான அலை வீச ஆரம்பித்தது. அந்த சமயத்தில் பஞ்சாபில் நடைபெற்ற சட்டப்பேரவை இடைத்தேர்தலில் ஆம் ஆத்மி படுதோல்வியை சந்தித்தது. 2019-ம் ஆண்டு மக்களவைத் தேர்தலிலும் அதன் தாக்கம் எதிரொலித்தது. அந்த தேர்தலில் டெல்லியில் அனைத்து தொகுதிகளிலும் மீண்டும் ஆம் ஆத்மி தோல்விக் கண்டது. தங்களின் எண்ணம் ஈடேறிவிட்ட போதிலும், ஆம் ஆத்மியை இத்துடன் விட்டுவிடுவதற்கு எதிர்க்கட்சிகளுக்கு மனம் இல்லை. டெல்லியில் செய்ததை போலவே பஞ்சாபிலும் அதன் அடித்தளத்தை அசைத்து பார்க்க முடிவெடுத்த எதிர்க்கட்சிகள், அந்த மாநிலத்தில் இருந்த மக்கள் செல்வாக்குமிக்க ஆம் ஆத்மி தலைவர்களை தங்கள் பக்கம் இழுக்க தொடங்கினர். ஆட்சி அதிகாரத்துக்கு ஆசைப்பட்டவர்கள் ஆளுங்கட்சியிலும், பணத்துக்கு விலைப் போனவர்கள் எதிர்க்கட்சிகளிலும் இணைந்தனர். முடிவு, பஞ்சாபில் ஆம் ஆத்மியின் முகாம் ஒருகட்டத்தில் காலியாகி போனது. டெல்லியிலும், பஞ்சாபிலும் ஆம் ஆத்மிக்கு ஏற்பட்ட நிலைமை, கேஜ்ரிவாலுக்கு பெரும் அதிர்ச்சியாக இருந்தாலும் அவர் மனம் சோர்வடையவில்லை. மக்கள் மீது தான் வைத்திருந்த நம்பிக்கையையும் அவர் இழக்கவில்லை. ஆட்டத்தை மாற்றிய கேஜ்ரிவால்... தொடர் தோல்விகளுக்கும், சறுக்கல்களுக்கும் என்ன காரணம் என யோசித்த அர்விந்த் கேஜ்ரிவால், தனது அரசியல் ஆட்டத்தை வேறு மாதிரியாக ஆட முடிவெடுத்தார். அதுவரை பாஜகவையும், பிரதமர் நரேந்திர மோடியையும் கடுமையாக வசைப்பாடி வந்த அவர், அதனை முழுமையாக நிறுத்தி, டெல்லி அரசு நிர்வாகத்தில் தனது முழு கவனத்தையும் செலுத்தினார். மிக முக்கியமாக, பாஜகவின் இந்துத்துவ அரசியலுக்கு எதிராக பேசுவதை முற்றிலுமாக கைவிட்டார். மேலும், கோயில் வழிபாடுகளை அவர் வெளிப்படையாக செய்ய தொடங்கினார். இதன் மூலமாக, 'இந்து மக்களுக்கு ஆம் ஆத்மி விரோதி அல்ல' என்ற பிம்பத்தை மக்கள் முன்பு வலுவாக கட்டமைத்தார். அதற்கு பல தரப்பில் இருந்தும் பெரிய அளவில் வரவேற்பும் கிடைத்தது. ஒருபுறம், டெல்லியில் புதிய புதிய வளர்ச்சித் திட்டங்களை செயல்படுத்தி வந்த கேஜ்ரிவால், மறுபுறம் தன் மீதான ஊழல் குற்றச்சாட்டுகளை ஒன்றன் பின் ஒன்றாக தவிடுப்பொடியாக்கி மீண்டும் ஆம் ஆத்மியின் நேர்மையை மக்கள் முன்பு நிரூபித்துக் காட்டினார். இவ்வாறு, தான் இழந்த மக்கள் செல்வாக்கை கேஜ்ரிவால் படிப்படியாக உயர்த்தினார். விளைவு, டெல்லி மறுபடியும் ஆம் ஆத்மியை கொண்டாட தொடங்கியது. அடுத்து வந்த 2020 டெல்லி சட்டப்பேரவைத் தேர்தலில் ஆம் ஆத்மி பெரும் வெற்றியை பெற்றது. டெல்லியில் ஆம் ஆத்மிக்கு கிடைத்த வெற்றியானது, பஞ்சாபிலும் அக்கட்சிக்கு சாதகமான அலைகளை உருவாக்கியது. பஞ்சாப் அரசியல் இந்த தருணத்துக்காகவே காத்திருந்த கேஜ்ரிவால், மீண்டும் பஞ்சாபில் ஆம் ஆத்மியை அமைப்பு ரீதியாக பலப்படுத்த தொடங்கினார். 2022-ம் ஆண்டு பஞ்சாப் சட்டப்பேரவைத் தேர்தலை குறி வைத்து, அரசியல் காய்களை நகர்த்த தொடங்கியது ஆம் ஆத்மி. அந்த மாநிலத்தில் காங்கிரஸும், சிரோன்மணி அகாலி தளமும் வழக்கம் போல மாறி மாறி சேற்றை பூசி வந்த நிலையில், ஆம் ஆத்மியோ 'டெல்லி மாடல்' என்ற கோஷத்துடன் களம் இறங்கியது. 'பஞ்சாபில் ஊழலை வேரறுப்பதுடன், இளைஞர்களுக்கு வேலைவாய்ப்புகளை வழங்கி வளர்ச்சியை ஏற்படுத்துவதுதான் தனது பிரதான குறிக்கோள்' என அர்விந்த் கேஜ்ரிவால் முழங்கினார். 'பஞ்சாபில் பன்னெடுங்காலமாக இருக்கும் போதைப்பொருள் கடத்தலை ஒழிப்போம்' என வாக்குறுதி அளித்தார். டெல்லியை போலவே அரசுப் பள்ளிகளில் தரமான கல்வியையும், அரசு மருத்துவமனைகளில் சர்வதேச தரத்திலான சிகிச்சையையும் வழங்குவோம் என ஆம் ஆத்மி பிரச்சாரம் செய்தது. அதேபோல, ஆட்சிப் பொறுப்பேற்றதும் விவசாயிகளுக்கு 200 யூனிட் இலவச மின்சாரம் வழங்குவதுதான் முதல் கையெழுத்தாக இருக்கும் என கேஜ்ரிவால் அறிவித்தது, விவசாய பெருங்குடிகளை வெகுவாக ஈர்த்தது. அனைத்துக்கும் மேலாக, பெண்களுக்கு மாதந்தோறும் ஆயிரம் ரூபாய் வழங்கப்படும் என்ற ஆம் ஆத்மியின் வாக்குறுதி, மகளிர் மத்தியில் பெரும் வரவேற்பை பெற்றது. கடந்த முறை செய்த தவறை திருத்தும் விதமாக, முதல்வர் வேட்பாளரை முன்கூட்டியே ஆம் ஆத்மி அறிவித்தது. அதுவும், ஒரு செல்போன் எண்ணை மக்களிடம் கொடுத்து, 'நீங்கள்தான் உங்கள் முதல்வர் வேட்பாளரை பரிந்துரைக்க வேண்டும்' என ஆம் ஆத்மி கூறியது, மக்களை அக்கட்சிக்கு மிக நெருக்கத்தில் கொண்டு வரச் செய்தது. அதன்படியே மக்கள் பரிந்துரைத்த பகவந்த் மான் முதல்வர் வேட்பாளராக முன்னிறுத்தப்பட்டார். இந்த முறையும் கேஜ்ரிவாலை காலிஸ்தான் ஆதரவாளர் என்றும், வெளிமாநிலத்தவர் எனவும் எதிர்க்கட்சிகள் பிரச்சாரம் செய்தன. ஆனால், ஆம் ஆத்மியின் 'டெல்லி மாடல்' பிரச்சாரம் அவை அனைத்தையும் நிர்மூலமாக்கியது. இவ்வாறு அடுத்தடுத்து வந்த தடைகளை தகர்த்தெறிந்த ஆம் ஆத்மி, தற்போது பஞ்சாப் சட்டப்பேரவைத் தேர்தலில் மாபெரும் வெற்றியை பெற்று வரலாற்று சாதனையை படைத்திருக்கிறது. அதுமட்டுமல்லாமல், பஞ்சாபில் அக்கட்சி பெற்ற வெற்றியானது, ஆம் ஆத்மியை தேசிய அரசியலின் மையப் புள்ளிக்கு அருகே நகர்த்தியுள்ளது. 2024 மக்களவைத் தேர்தலில் மாற்று எதிர்க்கட்சி அணிக்காக திரிணாமுல், டிஆர்எஸ் போன்ற கட்சிகள் ஆர்ப்பாட்டத்துடன் அணித்திரட்டி கொண்டிருக்க, ஆம் ஆத்மியோ எந்தவித சலனுமும் இல்லாமல் பாஜகவுக்கு மாற்று சக்தியாக உருவாகிவிட்டிருக்கிறது. பஞ்சாப் தேர்தலில் வெற்றி பெற்றது ஒரு பெரும் சாதனை தான் என்றாலும் கூட, புதிய ஆம் ஆத்மி அரசுக்கு முன்பு ஏராளமான சவால்கள் குவிந்து கிடக்கின்றன. மிக முக்கியமாக, பஞ்சாபில் தலைவிரித்தாடும் வேலையில்லா திண்டாட்டத்தையும், எல்லை தாண்டி நடைபெறும் போதைப்பொருள் கடத்தலையும் ஆம் ஆத்மி எப்படி சமாளிக்கப் போகிறது என்பத தான் அனைத்து தரப்பினரும் எழுப்பும் கேள்வியாக உள்ளது. அதுமட்டுமின்றி, நீண்டகாலம் பஞ்சாபில் அரசியல் செய்து வந்த சிரோன்மணி அகாலி தளம் உள்ளிட்ட பிராந்தியக் கட்சிகளின் குடைச்சலை எப்படி ஆம் ஆத்மி எதிர்கொள்ள போகிறது என்பதும், தனக்கு மாற்று சக்தியாக உருவெடுத்துள்ள ஆம் ஆத்மிக்கு மத்திய பாஜக அரசு பஞ்சாபில் எவ்விதத்தில் ஒத்துழைப்பு அளிக்கும் என்ற கேள்விகளும் அடுக்கடுக்காக எழுகின்றன. பல சோதனைகளை கடந்து சாதனை படைத்த ஆம் ஆத்மி, பஞ்சாபில் உள்ள சவால்களையும் சமாளித்து தனது வெற்றிப் பயணத்தை தொடருமா என்பதை பொறுத்திருந்து தான் பார்க்க வேண்டும்.
http://dlvr.it/SLVp7J

Read More

உ.பி: தேர்தல் களத்தில் `புல்டோசர் பாபா'வாக மாறிய யோகி ஆதித்யநாத்! - பின்னணி என்ன?

உத்தரப்பிரதேச சட்டமன்றத் தேர்தலில் பா.ஜ.க பெரும்பான்மையுடன் வெற்றிபெற்றிருக்கிறது. லக்னோவில் பா.ஜ.க தொண்டர்கள் இந்த வெற்றியைக் கொண்டாடும் விதமாக புல்டோசரில் வந்து தங்கள் வெற்றிக்களிப்பை வெளிப்படுத்தினர். லக்னோவைச் சேர்ந்த பா.ஜ.க தொண்டர் ஒருவர் தன் தலையில் பொம்மை புல்டோசரை வைத்துக்கொண்டு என்.டி.டி.வி செய்தி நிறுவனத்துக்கு அளித்த பேட்டியில், ``நாளை முதல் எதிரணிகள் மீது புல்டோசர்கள் மீண்டும் செயல்படத் தொடங்கும்" எனக் குறிப்பிட்டார். உத்தரப்பிரதேச அரசியல் அதேபோல, யோகி ஆதித்யநாத் சட்டமன்றத் தேர்தல் பரப்புரையில், ``மாஃபியாக்களுக்கும் குற்றவாளிகளுக்கும் சொந்தமான சொத்துகளின் மீது நமது புல்டோசர்கள் நடவடிக்கை எடுக்கும்" எனக் குறிப்பிட்டுப் பேசினார். அதைத் தொடர்ந்து சமாஜ்வாடி கட்சித் தலைவர் அகிலேஷ் யாதவ் தனது தேர்தல் உரையில், ``முதலமைச்சர் 'பாபா புல்டோசர்' இந்தத் தேர்தலில் தோல்வியடைவார்" என்று பிரசாரம் செய்தார். இதற்குப் பதிலளிக்கும் விதமாக, ``புல்டோசர் பேசாது. ஆனால், நன்றாக வேலை செய்யும். மார்ச் 10-ம் தேதிக்குப் பிறகு புல்டோசர் சமூக விரோத சக்திகள் மற்றும் மாஃபியாக்களுக்கு எதிராக நகரும்" என யோகி ஆதித்யநாத் பேசினார்.பிரசாரத்தில் அகிலேஷ் யாதவ் மேலும், தேர்தல் பிரசாரத்தில் அடிக்கடி புல்டோசர் என்று வார்த்தையை தொடர்ந்து குறிப்பிட்டு பேசிவந்தார். அதனால் யோகி ஆதித்யநாத்துடன் புல்டோசரும் சேர்த்துப் பேசப்பட்டு வருகிறது. இந்த சூழலில்தான், தெலங்கானா பா.ஜ.க எம்.எல்.ஏ டி.ராஜா சிங் அவரது முகநூல் பக்கத்தில், ``யோகி ஆதித்யநாத் ஆட்சிக்கு வர விரும்பாதவர்களுக்காக ஆயிரக்கணக்கான புல்டோசர்கள் உ.பி முதல்வர் யோகி ஆதித்யநாத்தால் வாங்கப்பட்டுள்ளன. ஜே.சி.பி-கள் மற்றும் புல்டோசர்கள் எதற்காகப் பயன்படுத்தப்படுகின்றன என்பது உங்களுக்குத் தெரியும் என்று நான் நம்புகிறேன்.பிரதமருடன் யோகி ஆதித்யநாத் யோகி ஆதித்யநாத் மீண்டும் முதல்வராகத் தேர்ந்தெடுக்கப்படுவதை விரும்பாத துரோகிகள், உ.பி-யில் வாழ வேண்டுமானால் யோகி... யோகி என்று முழக்கமிட வேண்டும் என்பதைத் தெரிவித்துக் கொள்கிறேன். இல்லை என்றால் உ.பி-யை விட்டு ஓட வேண்டி இருக்கும்" என்று பேசியிருந்தார். அதையடுத்து வாக்காளர்களை மிரட்டியதற்காகத் தெலுங்கானா பா.ஜ.க எம்.எல்.ஏ 72 மணி நேரம் பிரசாரம் செய்யத் தடை விதிக்கப்பட்டது.அமைச்சர் பியூஷ் கோயல் உ.பி-யில் பா.ஜ.க மீண்டும் ஆட்சியைபிடித்திருக்கும் நிலையில், ``அதிகாரம் படைத்தவர்கள், அரசியல்வாதிகள் மற்றும் மாநில மாஃபியாக்களின் சட்ட விரோத சொத்துகளை முடக்கவும், சட்டத்தின் அதிகாரத்தை நிலைநாட்டவும், நிலச் சொத்துகளைப் பாதுகாக்கவும் புல்டோசர்கள் ஒரு கருவியாக மாறுகின்றன" என்று முதல்வர் யோகி ஆதித்யநாத் தன்னை `புல்டோசர்' -ஆக பாவித்து இந்தியில் ட்வீட் செய்திருந்தார். அதைத் தொடர்ந்து மத்திய அமைச்சர் அனுராக் தாக்கூர், ``கட்சித் தொண்டர்களின் உழைப்பின்றி இந்த மாநிலங்களில் வெற்றி கிடைத்திருக்காது. புல்டோசர் மாஃபியாக்கள் மற்றும் குற்றவாளிகளை வேரோடு பிடுங்குவதற்கான அடையாளமாக மாறியுள்ளது. உ.பி-யில் பிரதமர் மோடியின் கொள்கைகளை மேலும் செயல்படுத்துவோம்" எனத் தெரிவித்திருந்தார்.யோகி ஆதித்யநாத் ட்வீட் மேலும் மத்திய அமைச்சர் பியூஷ் கோயல், ``இந்த வெற்றி நாடு முழுவதும் பிரதமர் மோடிக்கு உள்ள பிரபலத்தைக் காட்டுகிறது. பிரதமர் மோடி மற்றும் முதல்வர் யோகியின் சமூக நலத்திட்டங்கள் நேர்மையாகச் செயல்படுத்தப்பட்டதன் விளைவு இது.ட்ரென்டாகும் புல்டோசர் மீண்டும் வந்துவிட்டது ஹேஷ்டேக் வளர்ச்சிக்கான புல்டோசர் உ.பி-யில் தொடர்ந்து செயல்படும். கோவா மற்றும் மணிப்பூரில் முன்பைவிட அதிக இடங்களைப் பெற்றுள்ளோம்" என புல்டோசரை உவமையாக வைத்தே அரசியல் பேசத் தொடங்கிவிட்டனர். அதேபோல, தேர்தல் ஹேஷ்டேக்குகளுடன் 'புல்டோசர் மீண்டும் வந்துவிட்டது' என்ற ஹேஷ்டேக்கும் டிரெண்டிங்கில் இருந்தது. ``யோகிக்கு வாக்களிக்காத துரோகிகளை...!" - பாஜக எம்.எல்.ஏ சர்ச்சைப் பேச்சு
http://dlvr.it/SLVGfs

Read More

``பாஜக-வின் வெற்றியை குறைக்க முடியும் என்பதை காட்டியுள்ளோம்!" - தேர்தல் முடிவுகள் குறித்து அகிலேஷ்

உத்தரப்பிரதேசம், உத்தரகாண்ட், பஞ்சாப், மணிப்பூர், கோவா ஆகிய மாநிலங்களுக்கான சட்டமன்ற தேர்தல் வாக்கு எண்ணிக்கை நேற்றுடன் முடிவடைந்தன. பஞ்சாப்பில் 92 இடங்களைக் கைப்பற்றிய ஆம் ஆத்மி தனிப்பெரும்பான்மையுடன் முதல்முறையாக ஆட்சியமைக்கவுள்ளது. மற்ற நான்கு மாநிலங்களிலும் பா.ஜ.க ஆட்சியைக் கைப்பற்றியுள்ளது. கோவாவில் மட்டும் சுயேச்சை வேட்பாளர்களின் ஆதரவுடன் பா.ஜ.க ஆட்சியமைக்கிறது. இந்த 5 மாநில தேர்தலில் காங்கிரஸ் ஒரு மாநிலத்தில் கூட ஆட்சியைக் கைப்பற்றவில்லை.அகிலேஷ், யோகி இந்த நிலையில், உத்தரப்பிரதேசத்தில் அனைவராலும் எதிர்பார்க்கப்பட்ட , அகிலேஷ் யாதவின் சமாஜ்வாடி 111 இடங்களை வென்றது. இதையடுத்து அகிலேஷ் யாதவ், "எங்களின் இடங்களை இரண்டரை மடங்கும், வாக்கு வங்கியை ஒன்றரை சதவிகிதம் மேலும் உயர்த்தியதிற்கும் உத்தரப்பிரதேச மக்களுக்கு மனமார்ந்த நன்றி. பா.ஜ.க-வின் இடங்களைக் குறைக்க முடியும் என்பதை நாங்கள் காட்டியுள்ளோம். இந்த குறைப்பு இன்னும் தொடரும். பொதுநல போராட்டம் வெல்லும்" என ட்விட்டரில் இன்று பதிவிட்டுள்ளார். உத்தரப்பிரதேசத்தில் 37 வருடமாக எந்தக் கட்சியும் தொடர்ச்சியாக இரண்டு முறை ஆட்சியமைத்ததே இல்லை. ஆனால் முதல்முறையாக இந்த நிலையை உடைத்து பா.ஜ.க மீண்டும் உத்தரப்பிரதேசத்தில் ஆட்சியமைத்திருக்கிறது.உத்தரப்பிரதேசத்தில் ஆட்சியைத் தக்கவைக்க காரணம் யோகி ஆட்சியா... மோடி அலையா?
http://dlvr.it/SLTq2c

Read More

``ஏழைகள் உரிமைகளைப் பெறும் வரை நான் ஓய்வெடுக்கப் போவதில்லை!" - வெற்றி கூட்டத்தில் பிரதமர் மோடி

ஐந்து மாநில சட்டசபைத் தேர்தல் முடிவுகளில், உத்தரப்பிரதேசம், உத்தரகாண்ட், மணிப்பூர், கோவா ஆகிய மாநிலங்களில் அமோக வெற்றி பெற்றதை அடுத்து, டெல்லியில் உள்ள பாஜக தலைமை அலுவலகத்தில் கொண்டாட்டங்கள் நடைபெற்றன. பிரதமர் மோடி வியாழக்கிழமை மாலை பா.ஜ.க-வின் தேசிய தலைமையகத்திற்குச் சென்றார். நான்கு மாநிலங்களில் பா.ஜ.க-வினர் சிறப்பாகச் செயல்பட்டதாகப் பிரதமர் மோடி பாராட்டினார். வெற்றி கூட்டத்தில் பிரதமர் மோடி அதைத் தொடர்ந்து பேசிய பிரதமர் மோடி, ``இது உற்சாகமான பண்டிகைகளின் நாள். இந்த உற்சாகம் இந்தியாவின் ஜனநாயகத்திற்கானது. பெண்களின் சக்தி கட்சியின் வெற்றிக்கு வழிவகுத்துள்ளது. மார்ச் 10 முதல் ஹோலி தொடங்கும் என்று நாங்கள் முன்பே கூறியிருந்தோம். பாஜகவின் இந்த வெற்றியை உறுதி செய்த அனைத்து வாக்காளர்களுக்கும் எனது நன்றிகள். கோவாவில் ஆட்சி அமைக்கும் முயற்சியில் பா.ஜ.க உள்ளது. உத்தரப்பிரதேசம், உத்தரகாண்டில் கட்சி தனது செயல்திறனுடன் பல சாதனைகளைப் படைத்துள்ளது.டெல்லி பாஜக தலைமை அலுவலகம் உத்தரப்பிரதேசம் பல பிரதமர்களை வழங்கியுள்ளது, ஆனால் முதல் முறையாக யோகி ஆதித்யநாத் முழு பதவிக்காலத்திற்குப் பிறகு மீண்டும் முதல்வராகத் தேர்ந்தெடுக்கப்பட்டுள்ளார். ஏழைகளுக்கு அவர்களின் உரிமைகளை வழங்கும் அதே வேளையில், சிறந்த மற்றும் வெளிப்படைத்தன்மையுடன் ஆட்சி வழங்கப்பட்டுள்ளது என்பது இதிலிருந்து தெரிகிறது. ஏழைகள் தங்கள் உரிமைகளைப் பெறும் வரை நான் ஓய்வெடுக்கப் போவதில்லை. ஒவ்வொரு ஏழையிடமும் நாம் அவர்களின் பலன்களைச் சேர்ப்போம். உ.பி-யில் 2014 முதல் மாநில மக்கள் மீண்டும் மீண்டும் வளர்ச்சி அரசியலுக்கு மக்கள் வாக்களித்துள்ளனர்.வெற்றி கூட்டத்தில் பிரதமர் மோடி மணிப்பூர், உத்தரப்பிரதேசம் மற்றும் கோவாவில் பாஜகவின் வாக்கு சதவீதம் அதிகரித்துள்ளது. மேலும் கோவா மக்கள் தொடர்ந்து மூன்றாவது முறையாக அவர்களுக்குச் சேவை செய்ய எங்களுக்கு வாய்ப்பளித்துள்ளனர். 2019-ல் மத்தியில் நாங்கள் அரசாங்கத்தை அமைத்தபோது, அது உ.பி-யில் 2017-ல் பெற்ற வெற்றியால் சாத்தியப்பட்டதாக நிபுணர்கள் சொன்னார்கள்... 2022 தேர்தல் முடிவுகள் 2024 தேசியத் தேர்தலின் தலைவிதியை தீர்மானிக்கும் என்று அதே நிபுணர்கள் கூறுவார்கள் என்று நான் நம்புகிறேன்." எனத் தெரிவித்துள்ளார்.``நாடாளுமன்ற தேர்தலோடு சட்டமன்ற தேர்தலும் வரப்போகிறது!” - ஓ.பன்னீர்செல்வம் ஆரூடம்
http://dlvr.it/SLTTYP

Read More

அகிலேஷ் யாதவ்: தந்தை கொடுத்த முதல்வர் பதவி! - மீண்டும் கோட்டை விட்டாரா... வெற்றிகரமான தோல்வியா?

உத்தரப்பிரதேசத்தில் மிகவும் இளம் வயதில் முதல்வரானவர் என்ற பெயருடன் இருப்பவர் சமாஜ்வாடி கட்சி தலைவர் அகிலேஷ் யாதவ். முலாயம் சிங் யாதவ் மகனான அகிலேஷ் யாதவ் 2012-ம் ஆண்டு நடந்த சட்டமன்ற தேர்தலுக்கு பிறகு வந்த திடீர் முதல்வராகவே பார்க்கப்படுகிறார். அது வரை சமாஜ்வாடி கட்சி தலைவராகவும், 3 முறை முதல்வராகவும் இருந்த முலாயம் சிங் யாதவ் மூன்று முறையும் பிறகட்சிகளின் துணையோடுதான் முதல்வர் பதவியில் இருந்தார். ஆனால் 2012-ம் ஆண்டு நடந்த உத்தரப்பிரதேச சட்டமன்ற தேர்தலில் சமாஜ்வாடி கட்சி 224 தொகுதியில் வெற்றி பெற்றுதனிப்பெரும் கட்சியாக வந்தது. அந்நேரம் 73 வயதில் இருந்த முலாயம் சிங் யாதவ் தனது மகனை முதல்வராக்க இதுவே சரியான நேரம் என்று கருதி அகிலேஷ் யாதவை முதல்வராக்கினார். அகிலேஷ் யாதவ் - சமாஜ்வாடி தேர்தலின் போது அகிலேஷ் யாதவ் முதல்வர் வேட்பாளர் என்று அறிவிக்கப்படவே இல்லை. அறுதிப்பெரும்பான்மை இருக்கும் நேரத்தில் அகிலேஷ் யாதவ் முதல்வராக இருந்தால் எந்தப்பிரச்னையும் இருக்காது என்று கருதி 38 வயதில் அவரை முலாயம் சிங் யாதவ் முதல்வராக்கினார். மைசூரில் பட்டப்படிப்பை முடித்த அகிலேஷ் யாதவ் முதல்வராகும் முன்பு 2000-ம் ஆண்டிலிருந்து தொடர்ச்சியாக மூன்றுமுறை மக்களவை உறுப்பினராக இருந்திருக்கிறார். யோகியைப் போன்று இவரும் மக்களவை உறுப்பினர் பதவியில் இருந்து நேரடியாக முதல்வர் பதவிக்கு வந்துள்ளார். 1973-ம் ஆண்டு ஜூன் ஒன்றாம் தேதி பிறந்த அகிலேஷ் யாதவ் தற்போதைய யோகி ஆதித்யநாத்திற்கு முன்பு முதல்வர் பதவியை 5 ஆண்டுகள் பூர்த்தி செய்த தலைவராக இருந்தார். அதேசமயம் தமிழக முதல்வர் மு.க.ஸ்டாலின் போன்று கட்சியில் தனது கை ஓங்க அகிலேஷ் யாதவ் பெரிய அளவில் போராடியது கிடையாது. அகிலேஷ் யாதவ் 2012-ம் ஆண்டு சட்டமன்ற தேர்தலில் கடுமையாக அகிலேஷ் யாதவ் பணியாற்றினார். அகிலேஷ் யாதவ் முதல்வர் பதவிக்கு வந்த பிறகு அவர் கடுமையான சவால்களை எதிர்கொண்டார். சொந்த கட்சியை கட்டுக்குள் வைத்திருக்கவே மிகவும் சிரமப்பட்டார். அகிலேஷ் யாதவ் சித்தப்பா சிவ்பால் யாதவ் அகிலேஷ் யாதவ் தலைமைக்கு எதிராக போர்க்கொடி தூக்கினார். இதற்கு சமாஜ்வாடி கட்சியின் மூத்த தலைவர் அமர்சிங் ஆதரவு கொடுத்தார். 2016-ம் ஆண்டு கட்சிக்குள் இருந்த பிரச்னை பெரிய அளவில் வெடித்தது. சிவ்பால் யாதவ் கட்சியிலிருந்து வெளியேறி தனிக்கட்சியை ஆரம்பித்தார். இதனால் 2017-ம் ஆண்டு நடந்த சட்டமன்றதேர்தலில் சமாஜ்வாடி கட்சி வெறும் 47 இடங்களில் மட்டுமே வெற்றி பெற்றது. அதேசமயம் தோல்வி அடைந்தாலும் அகிலேஷ் யாதவ் கட்சியை முழுமையாக தனது கட்டுப்பாட்டிற்குள் கொண்டு வந்தார். கடந்த 5 ஆண்டுகளில் அகிலேஷ் யாதவ் தன்னை ஒரு சிறந்த எதிர்க்கட்சி தலைவராக முன்னிறுத்திக்கொண்டதோடு, குண்டர்களின் கட்சி என்ற பெயரையும் மாற்ற கடுமையாக போராடினர். ``அகிலேஷ் யாதவ் தேர்தல் முடிவுகளைப் பற்றிச் சிந்திக்க வேண்டாம்!" - சரத் பவார் ஆறுதல் தற்போது நடந்து முடிந்த சட்டமன்ற தேர்தலில் பாஜகவே எதிர்பாராத விதமாக பிற்படுத்தப்பட்ட தலைவர்களை தன் வசம் இழுத்த அகிலேஷ் யாதவ் பாஜகவிற்கு கடுமையான போட்டியை கொடுத்தார். இதனால் பாஜக அகிலேஷ் யாதவ் குடும்பத்தில் இருந்து சிலரை தங்களது கட்சிக்கு இழுக்கும் நிலைக்கு தள்ளப்பட்டது. தேர்தலுக்கு பிந்தைய கருத்துக்கணிப்புக்களில் சமாஜ்வாடி கட்சி 150 இடங்களுக்கு குறையாமல் பெறும் என்று தெரிவிக்கப்பட்டது. ஆனால் அந்த எண்ணிக்கையை பெற முடியாமல் அகிலேஷ் யாதவ் இரண்டாவது முறையாக தோல்வியை தழுவி இருக்கிறார். இன்னொரு புறம், பலம் வாய்ந்த பாஜக-வுக்கு எதிராக தனியாக களத்தில் நின்று கடந்த முறை பிடித்த இடங்களை விட இரு மடங்குக்கும் அதிகமான இடங்களை அகிலேஷ் கைபற்றியுள்ளதே பாஜகவுக்கு அதிர்ச்சி அளிக்கும் விஷயமாகவும் அரசியல் பார்வையாளர்களால் முன்வைக்கப்படுகிறது. அகிலேஷ் மீண்டும் கோட்டை விட்டாரா, அல்லது இது வெற்றிகரமான தோல்வியா என்பது 2024 நாடாளுமன்ற தேர்தல்களில் பாஜகவை எதிர்ப்பதில் அவரின் வியூகம் போன்றவை முடிவு செய்யும் என்ற பார்வையும் முன்வைக்கப்படுகிறது. நாட்டில் அதிக தொகுதிகளை கொண்ட மாநிலம் என்பதால், நாடாளுமன்ற தேர்தலிலும் உத்தரபிரதேசம் அதிக கவனம் கொண்டதாக இருக்கும்!
http://dlvr.it/SLRsGQ

Read More